Самарқанд вилоятида одам савдоси билан шуғулланувчи жиноий гуруҳ аъзоси қўлга олинди, деб хабар беради вилоят ИИБ ахборот хизмати.
Маълум қилинишича, Самарқанд вилояти ИИБ ҳамда ДХХ ходимлари ҳамкорлигида маҳаллий фуқароларни ноқонуний равишда хорижга жўнатиш билан шуғулланиб келаётган жиноий гуруҳга қарши тезкор тадбир ўтказилган.
Тадбир давомида Самарқанд шаҳрида яшовчи 55 ёшли С.Н. ўзининг жиноий шериклари билан биргаликда, икки нафар маҳаллий фуқарони 30 минг АҚШ доллари эвазига Исроил давлатига юборишни ваъда қилгани аниқланган. У сўралган пул маблағининг 13,1 минг долларини олган вақтида ашёвий далиллар билан ушланган.
Ҳозирда ҳолат юзасидан терговга қадар текширув ҳаракатлари олиб борилмоқда.
Аввалроқ Тошкентда фуқарони Анталияга юборишни ваъда қилиб, уни 6,5 минг долларга чув туширган туристик фирма ходимлари аниқлангани, Ўзбекистондан хорижга ишлаш учун юборилаётган фуқаролар расмий банд аҳоли тоифасига киритилиши, Андижонда фуқароларни Польшада ишлашга ноқонуний жўнатиш билан шуғулланган фирма аниқлангани тўғрисида хабар берилганди.
Изоҳ (0)