“Tolibon” hukumati butun Afg‘oniston hududida ko‘knori yetishtirishni taqiqladi. Bu boradagi tegishli qaror harakat yetakchisi Haybatulla Oxunzoda tomonidan qabul qilingan, deb xabar beradi “Fergana.ru”.
“Tolibon” yetakchisining qarorida ta’kidlanishicha, “afg‘onlarning barchasi ko‘knori yetishtirishga qat’iy taqiq qo‘yilgani haqida ogohlantirilgan”. Bunga rioya etmagan shaxslar shariat qonunlari bo‘yicha sud qilinadi, aniqlangan hosil esa zudlik bilan yo‘q qilinadi.
Shuningdek, Oxunzodaning qarori bilan “barcha turdagi giyohvandlik moddalari, tarkibida giyohvandlik moddalari bor tabletka va alkogol mahsulotlaridan foydalanish, ularni tashish, sotish, eksport hamda import qilish” taqiqlangan. Afg‘onistonda joylashgan barcha giyohvand moddalar ishlab chiqaruvchi korxonalar ham taqiqqa uchragan.
2021-yilning noyabr oyida Britaniyaning The Guardian nashri ko‘knori yetishtirish bilan shug‘ullanuvchi ayrim afg‘on fermerlaridan intervyu olgandi. Nashr tomonidan suhbatlashilgan afg‘onlar mamlakatning yangi hukumati opium yetishtirishni hech qachon taqiqlamasligiga ishonch bildirgandi.
“Opium bo‘lmaganida toliblar Afg‘onistonning oldingi hukumatiga qarshi urushni moliyalashtira olmagan bo‘lardi”, — degan edi giyohvand moddalar bilan savdo qiluvchi Ahmad Xon ismli shaxs. Shuningdek, u “Tolibon” opium ishlab chiqarishni taqiqlasa, bu fermerlar, narkobaronlar va jamoatchilik tomonidan salbiy qarshilanishini aytgan.
Eslatib o‘tamiz, avgust oxirlarida “Tolibon” harakati Afg‘onistonda hokimiyat tepasiga kelgach, mamlakatning giyohvand moddalari yetishtirishni to‘xtatishi haqida va’da bergandi. “Endi giyohvand moddalar ishlab chiqarilmaydi va kontrabanda yo‘li bilan boshqa davlatlarga olib o‘tilmaydi. Afg‘oniston afyun yetishtiradigan mamlakat bo‘lmaydi”, — degan harakat vakili Zabihulla Mujohid. U shunday siyosat olib borish uchun “Tolibon”ga xorij davlatlarining ko‘magi zarurligini ham ta’kidlagan.