Ўзбекистон транспорт инфратузилмаси орқали гиёҳванд моддаларни олиб ўтишга уринишлар кўпайган. Бу ҳақда ШҲТга аъзо давлатларнинг гиёҳвандликка қарши курашиш бўйича ваколатли органлари раҳбарларининг 12-мажлисида Ўзбекистон Вазирлар Маҳкамаси ҳузуридаги Гиёҳванд моддаларни назорат қилиш миллий ахборот-таҳлил маркази директори Олим Нарзуллаев маълум қилди, деб хабар беради «Дунё» агентлиги.
«Афғонистондан шимолий йўналиш орқали гиёҳванд моддалар савдосининг ҳажми ошмоқда. Айниқса, минтақа мамлакатлари билан фаол интеграция жараёнлари фонида уларнинг ҳудудлари орқали асосий гиёҳванд моддаларнинг оқими ортмоқда. Хусусан, Ўзбекистон транспорт инфратузилмаси орқали гиёҳванд моддаларни олиб ўтишга уринишлар кўпайгани кузатиляпти», — дейди Олим Нарзуллаев.
Ўтган бир йил ичида мусодара қилинган гиёҳванд моддалар ҳажми 1 минг 864,4 килограммга тенг бўлган. Бу кўрсатгич 2020 йилга нисбатан 20,9 фоизга кўп.
Эслатиб ўтамиз, 2021 йил август охирларида «Толибон» ҳаракати Афғонистонда ҳокимият тепасига келгач, мамлакатнинг гиёҳванд моддалари етиштиришни тўхтатиши ҳақида ваъда берганди. «Энди гиёҳванд моддалар ишлаб чиқарилмайди ва контрабанда йўли билан бошқа давлатларга олиб ўтилмайди. Афғонистон афюн етиштирадиган мамлакат бўлмайди», — деган ҳаракат вакили Забиҳулла Мужоҳид. У шундай сиёсат олиб бориш учун «Толибон»га хориж давлатларининг кўмаги зарурлигини ҳам таъкидлаган.
2022 йил апрель бошларида «Толибон» ҳукумати Афғонистонда опиум етиштириш ва гиёҳванд моддалар ишлаб чиқаришни тақиқлади. Ўзбекистон президентининг Афғонистон бўйича махсус вакили Исматулла Иргашев «Толибон»нинг мазкур қарори турли террористик гуруҳларни опий сотишдан тушган даромад манбасидан маҳрум қилишини айтган.
Изоҳ (0)