Rossiya bosqini boshlangandan beri Ukrainada kamida 202 nafar bola halok bo‘ldi, deb xabar qilmoqda mamlakat bosh prokuraturasi. Yana 361 nafar bola jarohatlangan.
Jabrlangan bolalarning aksariyati Donetsk (117), Kiyev (106) va Xarkov viloyatlariga (89) to‘g‘ri keladi. Idorada ta’kidlanishicha, bu raqamlar yakuniy emas, chunki faol harbiy harakatlar olib borilgan hududlarda qurbonlarni hisob qilish hali davom etmoqda.
Rossiya qurolli kuchlari tomonidan mamlakat bo‘ylab o‘qqa tutilish va bombardimon qilinishlar oqibatida 1018 ta ta’lim muassasasi zarar ko‘rgan, ulardan 95 tasi butunlay vayron bo‘lgan, deya xabar berdi bosh prokuratura.
Ukraina prezidenti Vladimir Zelenskiy CNN telekanaliga bergan intervyusida urush boshlangandan buyon harbiy harakatlar oqibatida 2,5 mingdan 3 ming nafargacha ukrainalik harbiy halok bo‘lganini ma’lum qilgandi. Davlat rahbarining so‘zlariga ko‘ra, yana 10 mingga yaqin harbiy xizmatchi yaralangan. “Ularning qanchasi omon qolishini aytish qiyin”, — deya qo‘shimcha qilgan Zelenskiy.
Keyinroq Rossiya Mudofaa vazirligi rasmiy vakili Igor Konashenkov brifing chog‘ida Ukraina armiyasi va Milliy gvardiyasi, shuningdek, chet ellik yollanma askarlarning tuzatib bo‘lmaydigan yo‘qotishlari 23 367 kishini tashkil qilishi haqida gapirdi.
Unga ko‘ra, 16-aprel holatiga birgina Mariupolda 4000 dan ortiq askar halok bo‘lgan, yana 1464 nafari taslim bo‘lgan. Qolganlar “Azovstal” metallurgiya zavodi hududida qamalga olingan.
Brifingda Konashenkov, shuningdek, Rossiya havo hujumidan mudofaa tizimlari G‘arb qurollarining katta partiyasini yetkazib berayotgan Ukraina harbiy-transport samolyotini Odessa viloyatida urib tushirganini ham aytdi.
Mavzuga doir:
Izoh (0)