Апрель бошларида Саудия Арабистони босими остида ўз ваколатларини Президент кенгашига топширган Яман президенти Мансур Ҳодий ҳозирда «уй қамоғида сақланмоқда». Бу ҳақда The Wall Street Journal ўз манбаларига таяниб, хабар берди.
Суҳбатдошлардан бирининг сўзларига кўра, Ҳодий ҳозирда Ар-Риёддаги қароргоҳда бўлиб, телефон алоқасидан фойдалана олмайди.
WSJ манбаларининг маълум қилишича, Саудия Арабистони валиаҳд шаҳзодаси Муҳаммад бин Салмон Ҳодийга ўз ваколатларини кенгашга топшириш тўғрисидаги декретни топширган. Маълумотларга кўра, шаҳзода Ямандаги бошқа етакчилар амалдаги президентнинг ўз ваколатларини топшириш вақти етганига рози бўлганини айтганди. Шунингдек, Ар-Риёд Ҳодий томонидан амалга оширилган коррупцион жиноятларни эълон қилиш орқали таҳдид қилган.
Газетанинг Саудия Арабистонидаги манбаси президентга уни фош этиш билан босим бўлганини рад этган.
Президент офиси раҳбари Абдулла ал-Алимий Ҳодийнинг уй қамоғига олингани тўғрисидаги маълумотни рад этган, бироқ ўзининг президент билан боғланиши учун вақт кераклигини таъкидлаган.
Ямандаги можаролар 2014 йилдан бери давом этмоқда. Ҳарбий зиддиятлар 2015 йилнинг март ойида Саудия Арабистони бошчилигидаги коалиция кучларининг республика президенти Мансур Ҳодий тарафига келиб қўшилганидан сўнг кучайди. Уларга Эрон томонидан қўллаб-қувватланаётган «Ансар Аллоҳ» ҳаракати таркибига кирувчи яманлик исёнчилар қаршилик кўрсатмоқда.
7 апрель куни Ҳодий Президент кенгаши ташкил этилиб, ўз ваколатларини унга топширишини эълон қилди. Кенгашдан ал-Алимий бошчилигида саккиз киши ўрин олган. У халққа биринчи мурожаатида «кенг қамровли тинчлик жараёни» орқали Яманда тинчлик ўрнатишга ваъда берган.
Изоҳ (0)