Xabar berganimizdek, joriy yilning 12—14-aprel kunlari Termiz shahrida Afg‘oniston temir yo‘llari boshqarmasi raisi Baxtulrahmon Sharafat boshchiligidagi Afg‘oniston delegatsiyasi bilan muzokaralar bo‘lib o‘tdi.
O‘zbekiston tomonidan ikki tomonlama munosabatlarni mustahkamlash bo‘yicha ko‘rilayotgan chora-tadbirlar va ko‘rsatilayotgan salmoqli yordam uchun afg‘onistonlik mehmonlar tomonidan minnatdorlik bildirildi. Uchrashuvda shuningdek, OAVlarda Afg‘oniston Respublikasi “O‘zbekiston temir yo‘llari” AJ bilan hamkorlikni to‘xtatishni rejalashtirayotgani haqidagi ma’lumotlarni rad etib, aksincha B. Sharafat ikki tomonlama hamkorlikni mustahkamlash va uni yanada kengaytirish haqidagi rejalarni alohida ta’kidladi. Jumladan, Afg‘oniston mutaxassislari “O‘zbekiston temir yo‘llari” AJga qarashli “So‘g‘diyona Trans” sho‘ba korxonasining faoliyati va 2011-yildan “Hayraton—Mozori-Sharif” temir yo‘l liniyasining ekspluatatsiyasi bo‘yicha olib borilayotgan ishlardan to‘liq mamnunligini bildirdi.
Afg‘onistondagi vaziyatni hisobga olgan holda, 2021-yilning ikkinchi yarmidagi temir yo‘l yuk aylanmasida sezilarli pasayish kuzatildi. 2022-yilning birinchi choragida hamkorlikda amalga oshirilgan chora-tadbirlar natijasida yuk aylanmasi hajmi o‘tgan yilgi ko‘rsatkichga yetdi (1,1 million tonnadan ortiq). Muzokaralar chog‘ida Afg‘oniston tomon “O‘zbekiston temir yo‘llari” aksiyadorlik jamiyati bilan birgalikda vagonlarni tushirish jarayonini tezlashtirish, bu orqali Hayraton stansiyasiga kiruvchi yuklar hajmini oshirish, shuningdek, imkoniyatlardan maksimal darajada foydalanish bo‘yicha chora-tadbirlarni tashkil etishga tayyorligini ta’kidladilar va shu bilan Naybobot va Mozori-Sharif stansiyalarini qayta tiklash jarayonlarini jadallashtirishga xizmat qilishi alohida ta’kidlandi.
Uchrashuv doirasida O‘zbekiston Respublikasi Prezidenti tashabbusi bilan tashkil etilgan Termiz shahridagi Afg‘oniston fuqarolarini o‘qitish ta’lim markaziga tashrif byurishdi. Shuningdek, mehmonlar Termiz lokomotiv deposidagi afg‘onistonlik temiryo‘lchilari o‘tayotgan amaliy mashg‘ulotlar o‘quv markazi faoliyati bilan ham tanishdilar. Delegatsiya a’zolari o‘z yurtining istiqbolli kadrlari bilan suhbatlashishdi, ular uchun yaratilgan ta’lim va turmush sharoitlari bilan yaqindan tanishishdi. Ta’lim sohasidagi hamkorlikni yanada rivojlantirish, xususan, afg‘onistonlik temiryo‘l mutaxassislarini tayyorlash va ularning malakasini oshirish uchun o‘zbekistonlik temiryo‘lchilar bilan birgalikda Hayraton stansiyasi qoshida dala o‘quv markazini tashkil etish rejalashtirilgan.
Afg‘oniston delegatsiyasi temir yo‘l infratuzilmasini, ayniqsa, ushbu sohadagi loyihalarni amalga oshirish muhimligini alohida ta’kidladi, chunki Afg‘oniston bugungi kunda hamkorlikni rivojlantirish yo‘nalishlaridan biri — Markaziy Osiyoni Janubiy Osiyo o‘rtasidagi integratsiyalashuv loyihalarida ham ishtirok etishdan manfaatli ekanligini qayd etdilar. Shu munosabat bilan “Mozori-Sharif—Qobul—Peshovar temir yo‘lining qurilishi” loyihasini amalga oshirishni jadallashtirish masalasi ham muzokaralarda alohida e’tiborda bo‘ldi. Xususan, yangi temir yo‘l liniyasini qurish loyihasining texnik-iqtisodiy asoslarini tayyorlashni tezlashtirishga yordam beradigan yo‘nalish bo‘ylab, dala ekspeditsiyasini tashkil etish lozim ekanligi muhokama qilindi.
Bugungi davrda, ayniqsa, internetda turli xil soxta ma’lumotlar avj olgan paytda jurnalistlar va OAV vakillariga alohida murojaat etmoqchimiz. Turli geosiyosatga oid mavzularni yoritish masalalariga jiddiy yondashishingizni, qator norasmiy havolalar va repostlardan ehtiyotkorlik bilan foydalanishingizni, eng muhimi, ma’lumotlarni tekshirish va qayta tekshirishingizni so‘raymiz.
Ma’lumot sheriklik huquqi asosida tayyorlandi.
Izoh (0)