Хабар берганимиздек, жорий йилнинг 12—14 апрель кунлари Термиз шаҳрида Афғонистон темир йўллари бошқармаси раиси Бахтулраҳмон Шарафат бошчилигидаги Афғонистон делегацияси билан музокаралар бўлиб ўтди.
Ўзбекистон томонидан икки томонлама муносабатларни мустаҳкамлаш бўйича кўрилаётган чора-тадбирлар ва кўрсатилаётган салмоқли ёрдам учун афғонистонлик меҳмонлар томонидан миннатдорлик билдирилди. Учрашувда шунингдек, ОАВларда Афғонистон Республикаси «Ўзбекистон темир йўллари» АЖ билан ҳамкорликни тўхтатишни режалаштираётгани ҳақидаги маълумотларни рад этиб, аксинча Б. Шарафат икки томонлама ҳамкорликни мустаҳкамлаш ва уни янада кенгайтириш ҳақидаги режаларни алоҳида таъкидлади. Жумладан, Афғонистон мутахассислари «Ўзбекистон темир йўллари» АЖга қарашли «Сўғдиёна Транс» шўъба корхонасининг фаолияти ва 2011 йилдан «Ҳайратон—Мозори-Шариф» темир йўл линиясининг эксплуатацияси бўйича олиб борилаётган ишлардан тўлиқ мамнунлигини билдирди.
Афғонистондаги вазиятни ҳисобга олган ҳолда, 2021 йилнинг иккинчи ярмидаги темир йўл юк айланмасида сезиларли пасайиш кузатилди. 2022 йилнинг биринчи чорагида ҳамкорликда амалга оширилган чора-тадбирлар натижасида юк айланмаси ҳажми ўтган йилги кўрсаткичга етди (1,1 миллион тоннадан ортиқ). Музокаралар чоғида Афғонистон томон «Ўзбекистон темир йўллари» акциядорлик жамияти билан биргаликда вагонларни тушириш жараёнини тезлаштириш, бу орқали Ҳайратон станциясига кирувчи юклар ҳажмини ошириш, шунингдек, имкониятлардан максимал даражада фойдаланиш бўйича чора-тадбирларни ташкил этишга тайёрлигини таъкидладилар ва шу билан Найбобот ва Мозори-Шариф станцияларини қайта тиклаш жараёнларини жадаллаштиришга хизмат қилиши алоҳида таъкидланди.
Учрашув доирасида Ўзбекистон Республикаси Президенти ташаббуси билан ташкил этилган Термиз шаҳридаги Афғонистон фуқароларини ўқитиш таълим марказига ташриф бюришди. Шунингдек, меҳмонлар Термиз локомотив депосидаги афғонистонлик темир йўлчилари ўтаётган амалий машғулотлар ўқув маркази фаолияти билан ҳам танишдилар. Делегация аъзолари ўз юртининг истиқболли кадрлари билан суҳбатлашишди, улар учун яратилган таълим ва турмуш шароитлари билан яқиндан танишишди. Таълим соҳасидаги ҳамкорликни янада ривожлантириш, хусусан, афғонистонлик темир йўл мутахассисларини тайёрлаш ва уларнинг малакасини ошириш учун ўзбекистонлик темир йўлчилар билан биргаликда Ҳайратон станцияси қошида дала ўқув марказини ташкил этиш режалаштирилган.
Афғонистон делегацияси темир йўл инфратузилмасини, айниқса, ушбу соҳадаги лойиҳаларни амалга ошириш муҳимлигини алоҳида таъкидлади, чунки Афғонистон бугунги кунда ҳамкорликни ривожлантириш йўналишларидан бири — Марказий Осиёни Жанубий Осиё ўртасидаги интеграциялашув лойиҳаларида ҳам иштирок этишдан манфаатли эканлигини қайд этдилар. Шу муносабат билан «Мозори-Шариф—Қобул—Пешовар темир йўлининг қурилиши» лойиҳасини амалга оширишни жадаллаштириш масаласи ҳам музокараларда алоҳида эътиборда бўлди. Хусусан, янги темир йўл линиясини қуриш лойиҳасининг техник-иқтисодий асосларини тайёрлашни тезлаштиришга ёрдам берадиган йўналиш бўйлаб, дала экспедициясини ташкил этиш лозим эканлиги муҳокама қилинди.
Бугунги даврда, айниқса, интернетда турли хил сохта маълумотлар авж олган пайтда журналистлар ва ОАВ вакилларига алоҳида мурожаат этмоқчимиз. Турли геосиёсатга оид мавзуларни ёритиш масалаларига жиддий ёндашишингизни, қатор норасмий ҳаволалар ва репостлардан эҳтиёткорлик билан фойдаланишингизни, энг муҳими, маълумотларни текшириш ва қайта текширишингизни сўраймиз.
Маълумот шериклик ҳуқуқи асосида тайёрланди.
Изоҳ (0)