“Liverpul” Angliya Kubogi yarim finalida “Manchester Siti”ni mag‘lub etib (3:2), final yo‘llanmasiga ega chiqdi.
Mersisaydliklar Yurgen Klopp qo‘l ostida ilk bor musobaqa finaliga yo‘l oldi. Bunga qadar jamoa mutaxassis davrida 1/8 finaldan nariga o‘tolmagandi.
So‘nggi bor “Liverpul” Angliya Kubogi finalida 2011/12-yilgi mavsumda o‘ynagan va unda “Chelsi”ga imkoniyatni boy bergandi (1:2). Turnirdagi so‘nggi sovrin esa 2005/06-yilgi mavsumda qo‘lga kiritilgan.
“Liverpul” barcha musobaqalar doirasida qatorasiga 8 o‘yindan beri yutqazmayapti. Oxirgi marta “qizillar” 12-mart kuni “Inter”ga yutqazgandi (0:1). “Liverpul” mazkur g‘alaba orqali top-5 ligalarda trebl qayd etishi mumkin bo‘lgan yagona jamoaga aylandi.
“Manchester Siti” esa ketma-ket uchinchi o‘yinda g‘alaba qozona olmadi. Avvalroq jamoa Chempionlar Ligasida “Atletiko”, APLda “Liverpul” bilan durang o‘ynagandi.
Izoh (0)