Turkmaniston sobiq prezidenti, Xalq Maslahati Milliy kengashi raisi Gurbanguli Berdimuhamedov Turkiy davlatlar tashkiloti Oqsoqollar kengashi a’zosiga aylandi. Bu haqda tashkilot matbuot xizmati xabar berdi.
2019-yilning sentabrida Turkmaniston mustaqilligining 28 yilligi, shuningdek, fuqarolarning talabiga ko‘ra, Gurbanguli Berdimuhamedov Faxriy xalq oqsoqoli unvonini olgandi.
Turkiy davlatlar tashkiloti kotibiyatining hisoblashicha, sobiq prezident o‘zining donoligi, tajribasi va bilimi bilan Oqsoqollar kengashi potensialini yanada boyitadi va tashkilot nufuzini oshiradi.
“Berdimuhamedovning Turkiy davlatlar tashkilotining maslahat organi bo‘lgan Oqsoqollar kengashidagi ishtiroki Turkmanistonning turkiy dunyoda siyosiy, iqtisodiy va madaniy-gumanitar sohalarda ko‘p qirrali hamkorlikni chuqurlashtirishga qo‘shayotgan hissasiga yangi sur’at bag‘ishlaydi”, — deyiladi xabarda.
Turkmaniston davlat axborot agentligi bu haqda hozircha xabar bermagan. 1-apreldan buyon sobiq prezident noma’lum muddatga ta’tilga chiqqan.
Eslatib o‘tamiz, 2021-yilning noyabrida Turkmaniston Turkiy davlatlar tashkilotiga kuzatuvchi maqomida qabul qilingandi.
Izoh (0)