NYT АҚШ Конгрессининг икки аъзоси Киевга ташриф буюрганини маълум қилди

АҚШ Конгрессининг Республикачилар партиясидан сайланган икки нафар аъзоси — Стив Дейнс ва Виктория Спартц Киевга ташриф буюриб, унга қўшни Буча шаҳри ва Бородянка қишлоғини кўздан кечирди, деб хабар беради The New York Times.

Маълумотларга кўра, конгрессменлар Киевга Ғарбий Украина ҳудудидан поездда келган. Бир кун аввал улар Украина расмийларидан таклиф олишган.

Газетанинг ёзишича, бу Россия томонидан махсус операция бошланганидан бери АҚШ расмийларининг Украинага илк бор ташриф буюриши. Дейс ташриф билан Шарқий Европа давлатларида бўлган, бироқ сафарини қолдириб, Киевга йўл олишга мажбур бўлган. Ўз навбатида Спартц Украинада туғилгани сабаб мамлакатга «норасмий ташрифни режалаштирган».

Ташриф давомида парламентнинг иккала аъзоси АҚШ томонидан Украинага ҳарбий ёрдам кўрсатилишини қўллаб-қувватлаган.

Шу куннинг ўзида АҚШ президенти Жо Байден ўз администрациясининг юқори мартабали амалдорини музокаралар учун Киевга юбораётганини маълум қилган. Журналистнинг ким бориши тўғрисидаги аниқлаштирувчи саволига Байден «Сиз боришга тайёрмисиз?», дея жавоб берган. Журналистнинг «Ўзингиз-чи?», деган саволига АҚШ президент «ҳа», дея жавоб қайтарган.

Daily Mail’нинг ёзишича, Байден бу каби ташрифни амалга оширишга биринчи марта қизиқиш билдирмаяпти. Март ойида Польшадаги америкалик ҳарбийлар билан учрашув давомида Байден Украина чегарасини кесиб ўтолмаслигини, бунга йўл қўймасликларини айтганди.

Оқ уй администрациясининг вазиятдан хабардор вакилининг сўзларига кўра, президент Байден ёки вице-президент Харриснинг Украинага ташрифи ҳақида гап кетмаяпти, бу АҚШ давлат котиби Энтони Блинкен ёки мудофаа вазири Ллойд Остин бўлиши мумкин.

Февраль охиридан буён Украинага айрим хориж сиёсатчилари ташриф буюрди, хусусан, Евроиттифоқнинг ташқи ишлар масалалари бўйича олий вакили Жозеп Боррел, Еврокомиссия раҳбари Урсула фон дер Ляйен. Улар Киевга 8 апрель куни келганди. Шунингдек, Буюк Британия бош вазири Борис Жонсон, Австрия канцлери Карл Нехаммер ҳам Киевга ташриф буюрган.