Россиянинг Украинага бостириб кириш оқибатида 1,7 миллиард одам — инсониятнинг бешдан бир қисмидан ортиғи қашшоқлик, муҳтожлик ва очлик домига дуч келиши мумкин. Бу ҳақда БМТ бош котиби Антониу Гутерриш огоҳлантирди.
Украина ва Россия бутун дунё бўйлаб ишлаб чиқариладиган буғдой ва арпанинг 30 фоизи, маккажўхорининг бешдан бир қисми ва кунгабоқар ёғининг ярмидан кўпи билан таъминлайди. Шу билан бирга, иқтисодиёти паст ривожланган дунёнинг 45 та давлати учун Россия ва Украинадан етказиб бериш улуши улар томонидан импорт қилинадиган барча доннинг учдан бир қисмидан кўпроғини ташкил қилади.
Шунингдек, БМТ Россия дунёда энг йирик газ экспортчиси, нефть бўйича эса иккинчи ўринда туришини эслатиб ўтган.
Уруш коронавирус пандемияси сабаб ривожланаётган давлатлар дуч келган муаммоларни, ташқи қарз ва инфляциянинг ўсишини янада чуқурлаштирди.
2022 йил бошидан буён буғдой ва жўхори нархи 30 фоизга ошган, сўнгги бир йил ичида нефть нархи 60 фоиздан ортиққа кўтарилган, табиий газ ва ўғитлар нархи эса икки баробарган ошган.
Антониу Гутерришнинг сўзларига кўра, БМТнинг мазкур вазият бўйича фавқулодда чоралар кўришни молиялаштиришга маблағи етарли эмас. Хусусан, БМТнинг Жаҳон озиқ-овқат дастури ресурслар етишмаётганини эълон қилган.
«Озиқ-овқат нархларининг кўтарилиши билан ижтимоий ва сиёсий беқарорлик ўртасида тўғридан-тўғри боғлиқлик бор. Дунёмиз бунга қодир эмас. Ҳозир ҳаракат қилишимиз керак», — дейди Гутерриш.
Аввалроқ АҚШ президенти Жо Байден Украинадаги уруш сабаб озиқ-овқат инқирози юзага келиши, бу биринчи навбатда қашшоқ давлатларга таъсир кўрсатиши ҳақида гапирганди. Йирик халқаро ташкилотлар, жумладан, Халқаро валюта жамғармаси, Жаҳон банки ва Жаҳон савдо ташкилоти очарчиликнинг олдини олиш бўйича судлик билан чора кўришга чақирган эди.
Изоҳ (0)