Россиянинг Самара вилояти губернатори ўринбосари Наталя Катина бошчилигидаги делегация Наманганга келди. Бу ҳақда «Дарё» мухбири Азизбек Абдувалиев хабар бермоқда.
Делегация таркибидан Самара ҳукумати масъуллари, вилоятдаги таълим ва тиббиёт тизимлари мутасаддилари, корхона ва компаниялар вакиллари ўрин олган.
Меҳмонларни Наманган вилояти ҳокими Шавкат Абдураззақов қабул қилди. У вилоятнинг экспорт ҳажмида Самара салмоқли ўрин эгаллаши, 2021 йили ушбу минтақага 9 миллион долларлик маҳсулотлар, жумладан, автомобиль ёритгичлари, момиқ сочиқлар, калава-ип ва нотўқима матолар юборилганини таъкидлади. Самара делегациясини жорий йил 22—31 май кунлари Наманганда бўлиб ўтадиган анъанавий халқаро гуллар фестивалига таклиф этди.
Наталя Катина Ўзбекистон, хусусан, Наманган вилоятнинг стратегик шерикларидан бири эканини билдирди. Унга кўра, Самара Россиянинг 14 та минтақадан иборат Приволжск федерал округида Ўзбекистон билан товар айланмаси бўйича биринчи ўринда туради. Пандемияга қарамай, охирги икки йил давомида вилоятнинг Ўзбекистон билан товар айланмаси 30 фоиздан кўпроққа ошган.
«Бу гал 19 та корхона ва компания, ташкилот ва муассаса вакиллари ҳамроҳлигида келдик. Миссиямиздан мақсад ўзаро алоқаларни янада мустаҳкамлашдан иборат. Самарада Наманганнинг текстил маҳсулотлари, қурилиш материаллари, мева-сабзавотларига қизиқиш ва эҳтиёж катта. Қолаверса, туризм борасидаги салоҳият ва имкониятларимиздан ҳали тўлиқ фойдаланганимиз йўқ. Биргина Самара—Наманган тўғридан-тўғри авиарейси йўлга қўйилгани ҳам шундан далолат беради», — деди Наталя Катина «Дарё» мухбирига берган интервьюсида.
Самара вилояти губернатори ўринбосари Наманган ҳокимининг вилоятда бўлиб ўтадиган халқаро гуллар фестивалида иштирок этиш ҳақидаги таклифини мамнуният билан қабул қилди. Ўз ўрнида, наманганлик тестил усталарини «Самара модаси» кўргазмасида, фермерларни эса мева-сабзавот ва полиз маҳсулотлари ярмаркасида фаол иштирок этишга чақирди.
Расмий қабулдан сўнг меҳмонлар ва мезбонларнинг юзма-юз амалий учрашувлари бошланди.
Делегациялар йўналишлари бўйича учта — таълим, тиббиёт ва тадбиркорлар гуруҳларига бўлиниб, ўзаро тақдимот ва музокараларга киришди.
Изоҳ (0)