“Manchester Siti” Chempionlar Ligasi chorak finalida ikki o‘yin natijasiga ko‘ra “Atletiko”dan ustun keldi (1:0, 0:0) va yarim final yo‘llanmasini qo‘lga kiritdi.
Uchrashuvning so‘nggi daqiqalarida futbolchilar o‘rtasida janjal yuzaga keldi.
Jamoalar asosiy vaqtlarga qo‘shimcha tarzda yana 12 daqiqa harakat qildi. Bunga maydondagi ketma-ket sodir bo‘lgan to‘qnashuvlar sabab bo‘ldi.
“Atletiko” himoyachisi Felipe 89-daqiqada Fil Fodenga qarshi qo‘pol o‘ynadi. Ikkala jamoa futbolchilari o‘rtasida tortishuv yuzaga keldi. Avvaliga Fodenni maydondan sudrab chiqarib tashlashga uringan Stefan Savich keyinroq Jek Grilishning sochidan tortdi.
Qo‘shib berilgan daqiqalarda esa bir qancha futbolchi sariq kartochka, Felipe esa qizil kartochkaga munosib ko‘rildi. Shuningdek, 100-daqiqada maydonga tushib ketgan “matraschilar” bosh murabbiyi Diego Simeone ham ogohlantirildi.
Hakamning final hushtagidan so‘ng futbolchilar o‘rtasidagi janjal tribuna ostida ham davom etgan. O‘yinchilar bir-birlarini turtgan holda, qo‘polliklar ishlatgan. Stefan Savich va Jek Grilish bu to‘nashuvlarda faollik ko‘rsatgani aytilmoqda. Natijada, UEFA xodimlari politsiyadan vaziyatga aralashishni so‘ragan.
Izoh (0)