«Манчестер Сити» Чемпионлар Лигаси чорак финалида икки ўйин натижасига кўра «Атлетико»дан устун келди (1:0, 0:0) ва ярим финал йўлланмасини қўлга киритди.
Учрашувнинг сўнгги дақиқаларида футболчилар ўртасида жанжал юзага келди.
Жамоалар асосий вақтларга қўшимча тарзда яна 12 дақиқа ҳаракат қилди. Бунга майдондаги кетма-кет содир бўлган тўқнашувлар сабаб бўлди.
«Атлетико» ҳимоячиси Фелипе 89-дақиқада Фил Фоденга қарши қўпол ўйнади. Иккала жамоа футболчилари ўртасида тортишув юзага келди. Аввалига Фоденни майдондан судраб чиқариб ташлашга уринган Стефан Савич кейинроқ Жек Грилишнинг сочидан тортди.
Қўшиб берилган дақиқаларда эса бир қанча футболчи сариқ карточка, Фелипе эса қизил карточкага муносиб кўрилди. Шунингдек, 100-дақиқада майдонга тушиб кетган «матрасчилар» бош мураббийи Диэго Симеоне ҳам огоҳлантирилди.
Ҳакамнинг финал ҳуштагидан сўнг футболчилар ўртасидаги жанжал трибуна остида ҳам давом этган. Ўйинчилар бир-бирларини туртган ҳолда, қўполликлар ишлатган. Стефан Савич ва Жек Грилиш бу тўнашувларда фаоллик кўрсатгани айтилмоқда. Натижада, УЕФА ходимлари полициядан вазиятга аралашишни сўраган.
Изоҳ (0)