Qirg‘iziston va Tojikiston chegarachilari o‘rtasida yana otishma sodir bo‘ldi, hodisa oqibatida bir nafar qirg‘iz harbiysi yaralangan. Bu haqda Qirg‘iziston Milliy xavfsizlik davlat qo‘mitasining chegara xizmati ma’lumotiga tayanib, “RBK” xabar berdi.
“2022-yil 12-aprel kuni qirg‘iz-tojik davlat chegarasida qurolli nizo sodir bo‘ldi. Qirg‘iziston chegarachilar naryadi Botken viloyatining Selkan Leylek tumani hududida xizmatni o‘tayotgan vaqtda ushbu yerga yaqin joyda tojik chegarachilari paydo bo‘lgan, ular hamkasblarini ko‘rgan bo‘lishiga qaramay davlat chegarasining shartli chizig‘i tomon harakatni davom ettirgan. Tojikiston askarlari Qirg‘iziston chegarachilarining to‘xtash va chegara chizig‘idan uzoqlashish bo‘yicha talabini pisand qilmagan, chegarani buzib, Qirg‘iziston hududida 20 metr masofa ichkariga kirgan”, — deyiladi Qirg‘iziston Milliy xavfsizlik davlat qo‘mitasi chegara xizmatining xabarida.
Qirg‘iziston tomoni tojik chegarachilarining mamlakat ichkarisiga yanada ichkariroq kirishini oldini olish maqsadida ularga qarata ogohlantirish tarzida o‘t ochgan. Tojikiston chegarachilari bunga javoban qirg‘iz askarlariga o‘q uzgan. Chegara xizmati ma’lumotiga ko‘ra, hodisa oqibatida tojikistonlik harbiy yaralangan.
Keyinchalik Qirg‘iziston chegara xizmati “24.kg” nashriga yana takroriy otishma yuz bergani va u 30 daqiqa davom etganini ma’lum qilgan. Tojik tomoni Qirg‘izistonning Dostuk qishlog‘ini minomyotlardan o‘qqa tutgan.
Tojikiston hukumati hodisa yuzasidan rasmiy izoh bermagan.
Qirg‘iz-tojik chegarasidagi to‘qnashuvlar 2022-yil yanvar oxiridan buyon davom etmoqda: yil boshida ikki davlat chegarasida yuz bergan otishma oqibatida ikki nafar chegarachi halok bo‘lgan, olti nafar tojikistonlik harbiy yaralangan, Qirg‘iziston tomonidan esa sakkiz nafar harbiy jarohatlangandi.
Ushbu voqeadan keyin Tojikiston hamda Qirg‘iziston delegatsiyalari chegarada o‘t ochishni to‘xtatish, nizo sodir bo‘lganidan keyin olib kelingan qo‘shimcha kuch va vositalarni u yerdan uzoqlashtirishni kelishib olgandi. Shunga qaramay chegarada bu kabi nizo hamda to‘qnashuvlar tez-tez sodir bo‘lib turibdi.
Qirg‘iziston va Tojikiston chegarasining uzunligi 970 kilometrni tashkil qiladi. Shundan 460 kilometr masofa yuzasidan ikki davlat o‘rtasida kelishuv mavjud emas, buning oqibatida chegarada turli nizolar sodir bo‘ladi, ikki mamlakat vakillari ham chegaradagi bir qator hududlar o‘zlariga tegishli ekanini da’vo qilishi oqibatida aholi yoki chegarachilar o‘rtasida kelishmovchiliklar yuzaga keladi.
Tojik-qirg‘iz chegarasida qurolli to‘qnashuvlar oxirgi yillarda ko‘p kuzatilmoqda. So‘nggi marta eng katta otishmalardan biri o‘tgan yili aprel oyida yuzaga kelgan. Nizoga ikki davlat uchun bahsli hudud hisoblangan “Golovnoy” suv taqsimlash inshooti yaqiniga kameralar o‘rnatilishi sabab bo‘lgan. Aholi o‘rtasidagi kelishmovchilikka keyinchalik ikki mamlakat harbiylari ham aralashgan.
To‘qnashuv oqibatida Qirg‘izistonning 180 nafar fuqarosiga talafot yetgan, 34 kishi halok bo‘lgan. Tojikiston esa nizo oqibatida jarohatlanganlar va halok bo‘lganlar haqida rasmiy axborot bermagan.
Izoh (0)