Parij olti nafar rossiyalik diplomatni persona non grata deb e’lon qildi. Maxsus xizmatlar ularning Fransiya milliy manfaatlariga qarshi ishlaganini aniqlagan. Bu haqda Fransiya TIV rasmiy saytida ma’lumot berilgan.
“Ichki xavfsizlik bosh boshqarmasi (DGSI) tomonidan uzoq vaqt davomida olib borilgan surishtiruvdan so‘ng 10-aprelda Rossiya maxsus xizmatlari tomonidan bizning hududda sirli operatsiya amalga oshirilgani fosh qilindi”, — deyiladi vazirlik bayonotida.
TIV bayonotiga ko‘ra, olti nafar rossiyalik agent Fransiyada diplomat niqobi ostida yashab yurgan. Rossiya elchisi mamlakat hududida bo‘lmagani tufayli Fransiya TIV qarorni e’lon qilish uchun uning o‘rinbosarini chaqirgan.
“Ular hammani biz o‘z pozitsiyamizni o‘zgartirishimizga umid qilib chiqarib yubormayapti. Biz o‘z nuqtayi nazarimizda qolamiz”, — deya holat yuzasidan izoh bergan Rossiya TIV vakili Mariya Zaxarova.
Shuningdek, Zaxarova Fransiya tashqi ishlar vazirligiga murojaat qilib, Parij Ukrainaning Minsk kelishuvlariga rioya qilishga majbur etganida Yevropada tinchlik va barqarorlik hukm surgan bo‘lishini eslatgan. Uning so‘zlariga ko‘ra Moskva Parijga bu borada tegishli javobni beradi.
Bir hafta avval 4-aprelda Fransiya TIV ko‘plab rossiyalik diplomatlarning mamlakatdan chiqarib yuborilishini e’lon qilgandi.
“Bu Yevropa vaziyatga bildirayotgan munosabatning bir qismi bo‘lgan harakat. Eng birinchi majburiyatimiz fransuzlar va yevropaliklar xavfsizligini ta’minlash”, — deyilgan bir hafta avval Fransiya TIV e’lon qilgan bayonotda.
Fransiya OAV o‘shanda gap 30-35 nafar rossiyalik diplomatning chiqarib yuborilishi haqida ketayotgani xususida xabar bergan. Zaxarova esa Moskvaning ushbu “surgunlar”ga “munosib javob” berishini aytgandi.
Bundan oldin Xorvatiya, Daniya, Fransiya, Germaniya, Polsha, Bolgariya, Latviya, Litva hamda Estoniya davlatlari rossiyalik diplomatlarni chiqarib yuborgandi. Yevropa Ittifoqining bir qancha mamlakatlari, xususan, Belgiya, Niderlandiya, Chexiya va Irlandiya ham o‘nlab rossiyalik diplomatlarni “surgun” qilgan.
Izoh (0)