Rossiya Ukrainadagi urush uchun Iroqdan eronlik kontrabandachilar yordamida qurol va o‘q-dorilar olgan, deb xabar beradi The Guardian. Nashrga bu haqda Iroq xalq safarbarlik kuchlari va mintaqaviy razvedka xizmatining ismini oshkor etmagan vakillari ma’lum qilgan.
Qurollarni tashishni tashkillashtirishga yordam bergan manbaning ma’lum qilishicha, Eron Rossiyaga “Bavar 373” zenit-raketa majmualarini topshirgan, shuningdek, oldinroq Tehron Moskvadan sotib olgan “C-300” zenit-raketa majmualarini qaytarib bergan.
25-martda Iroq xalq safarbarlik kuchlarining bitta bo‘linmasi Iroqdan Eronga qo‘lbola granatomyotlar va tankka qarshi raketalarni yuborgan. Tashuvlarni chegara orqali amalga oshirishga ma’sul bo‘lgan bo‘linma komandirining ta’kidlashicha, eronlik harbiylar yukni dengiz orqali Rossiyaga jo‘natgan. 1-aprel kuni Xalq safarbarlik kuchlarining Erondagi vakillari Braziliyada ishlab chiqarilgan ikkita Astros II reaktiv zalp o‘t ochish tizimini yuborgan.
The Guardian ma’lumotlariga ko‘ra, o‘sha kunlari harbiy yuklarni tashishga qodir uchta kema Kaspiy dengizini Eronning Bender-Enzeli shahridan kesib o‘tib, Rossiyaning Astaxaniga borgan. Kemalardan biri Eron, ikkitasi Rossiya bayrog‘i ostida harakatlangan.
4-aprel kuni Ukraina Mudofaa vazirligi Rossiya Gruziya hududidan sanksiyaga uchragan tovarlarni, xususan, harbiy maqsadlarga mo‘ljallangan yuklarni kontrabanda orqali olib kirishda foydalanayotganini ma’lum qilgandi. Idora ma’lumotlariga ko‘ra, Gruziya maxsus xizmatlari kontrabandachilarga to‘sqinlik qilmaslik bo‘yicha ko‘rsatma bergan. Mamlakat hukumati buni rad etmoqda.
Eslatib o‘tamiz, mart oyida Rossiya hukumati Xitoydan harbiy texnikalar taqdim etishini so‘ragandi. Oq uy Xitoy hukumatini urushda Rossiyani moddiy qo‘llab-quvvatlashning oqibatlari haqida ogohlantirgan.
Izoh (0)