Amerikaning Jons Hopkins universiteti ma’lumotlariga ko‘ra, dunyoda koronavirusga chalinganlar soni 500 milliondan oshdi. Pandemiya boshlangandan beri dunyo bo‘ylab 6 182 982 kishi COVID-19 dan vafot etdi.
Kasallanganlar va vafot etganlar soni bo‘yicha doimgidek AQSH yetakchilik qilmoqda, mamlakatda infeksiyaga chalinganlar soni 80 456 912 nafarga, kasallik qurbonlari soni esa 986 019 nafarga yetgan.
AQSHdan keyingi o‘rinda Hindiston turibdi, mamlakatda kasallanganlar soni 43 milliondan, vafot etganlar soni 521 mingdan oshgan. Braziliya 30, 1 million kasallanish holati va 661 ming o‘limlar bilan yuqori uchlikdan joy olgan.
Ayni vaqtga qadar jahon bo‘yicha 11,119 milliard doza vaksina qo‘llangan.
Jahon sog‘liqni saqlash tashkiloti omikron shtammining yangi turlaridan xavotirda, deb yozmoqda Deutsche Welle.
Nashr ma’lumotlariga ko‘ra, tashkilot omikron shtammining ikkita yangi kichik turi — BA.4 va BA.5 variantlarini kuzatmoqda. JSST ushbu shtammlarning qay darajada yuqumliligini aniqlash uchun ularni o‘z ro‘yxatiga kiritgan.
Bundan tashqari, JSST rahbari Tedros Adhanom Gebreyesus dunyoda COVID-19 pandemiyasi hali tugamaganini aytdi. Uning ta’kidlashicha, o‘tgan haftada COVID-19 dan o‘limlar soni pandemiyaning ikki yilidagi eng past darajani ko‘rsatgan, ammo virus rivojlanishda davom etmoqda.
Avvalroq Belgiyada omikronning BA.4 varianti bilan ilk kasallanish holat qayd etilgandi. Bunga qadar Hindistonda koronavirusning yangi XE shtammi bilan kasallanish bo‘yicha birinchi holat tasdiqlangan. XE — omikron shtammining ikki kichik turidan iborat gibrid bo‘lib, u boshqa mutatsiyalarga qaraganda 10 foiz tezroq yuqishi mumkin.
Izoh (0)