Kreml Ukrainada “maxsus harbiy operatsiya”ni o‘tkazish zarurligiga shubha qilmaydi va qo‘yilgan maqsadlarga erishiladi. Bu haqda Rossiya prezidenti Vladimir Putin Amur viloyatidagi “Vostochniy” kosmodromi ishchilari bilan uchrashuvda ma’lum qildi, deb xabar beradi “Interfaks”.
“Qilayotgan ishlarimiz bilan bir tomondan odamlarga yordam beryapmiz, ularni qutqaryapmiz, boshqa tomondan esa Rossiyaning o‘z xavfsizligini ta’minlash uchun shunchaki chora ko‘ryapmiz. Boshqa tanlovimiz yo‘qligi ravshan edi, bu to‘g‘ri qaror”, — deydi Putin.
Putinning fikricha, Ukraina “Rossiyaga qarshi harbiy operatsiyaga tayyorgarlik ko‘riladigan maydon”ga aylana boshlagan, u yerda “anchadan beri mavjud millatchilik holatlarining o‘sishi kuzatilgan”. “Neonatsizm, afsuski, bizga juda yaqin bo‘lgan davlatning asosiy yashash omiliga aylandi. Rossiya uchun bu kuchlar bilan to‘qnashuv muqarrar edi”, — deya hisoblaydi Putin.
Shuningdek, u Ukrainadagi maxsus operatsiyaning maqsadlari “mutlaqo tushunarli va oliyjanob” — Donbassdagi odamlarga yordam berish ekanini qo‘shimcha qilgan.
Vladimir Putin “Vostochniy” kosmodromiga Belarus prezidenti Aleksandr Lukashenko bilan tashrif buyurgan. Tashrif davomida Rossiya prezidenti rossiyalik kosmonavtlarga davlat mukofotlarini topshirgan, “Roskosmos”ga Oy dasturini amalga oshirish va rus kemasida belarus kosmonavtini uchirishga tayyorgarlik ko‘rish bo‘yicha topshiriq bergan.
Avvalroq Checheniston rahbari Ramzan Qodirov Rossiya Qurolli kuchlari Ukrainaning barcha shaharlariga hujum uyushtirishini va’da qilgandi. Uning so‘zlariga ko‘ra, Rossiya Qurolli kuchlari shaharlar, qishloq va boshqa aholi punktlariga hujumlarni uyushtirish orqali, ularni “natsistlar” va “banderachilar”dan ozod etishni rejalashtirmoqda.
Izoh (0)