O‘zbekistonda so‘nggi uch oyda elektrga noqonuniy ulanganlar tarmoqqa deyarli 50 milliard so‘m zarar yetkazgan. Bu haqda AOKAda o‘tkazilgan brifingda “O‘zenergoinspeksiya” axborot xizmati rahbari Navro‘z Norboboyev ma’lum qildi.
Norboboyevning so‘zlariga ko‘ra, “O‘zenergoinspeksiya” tomonidan 2022-yilning yanvar—mart oylari davomida vakolatli organ bilan kelishilgan holda o‘tkazilgan tadbirlarda 35 kilovatt va undan yuqori elektr qurilmalariga ega bo‘lgan tadbirkorlik subyektlari, energotizimi korxonalari, davlat tashkilotlarida hamda elektr tarmoqlariga noqonuniy ulanish bo‘yicha jami 221 ta holat aniqlangan. Buning natijasida 126 ta iste’molchi tomonidan elektr va issiqlik energiyasidan noqonuniy foydalangani aniqlanib, energota’minot korxonalari tomonidan jami 40,3 milliard so‘m yetkazilgan zarar bo‘yicha qayta hisob-kitoblar qilinishi ta’minlangan.
Shuningdek, shu vaqtga qadar tekshiruvlarda noqonuniy ulangan, qoniqarsiz texnik holatdagi jami 2191 ta elektr qurilmaning ishi hamda xavfsizlikka rioya qilmagan 14 ta brigadaning ishi to‘xtatildi. 148 ta mas’ul xodimiga ta’sir choralar ko‘rilishi ta’minlandi.
Bundan tashqari, hududiy elektr tarmoqlari korxonalari va huquqni muhofaza qiluvchi organlar bilan birga elektr tarmoqlariga noqonuniy ulangan iste’molchilarni aniqlash bo‘yicha qo‘shma nazorat tadbirlari o‘tkazilgan. Unga ko‘ra 277 ta iste’molchi tomonidan amaldagi qoidalarga rioya etmagan holda 12,8 million kilovatt/soat elektr energiyasidan noqonuniy foydalanilgani aniqlangan. Buning natijasida, tizimga 5,7 milliard so‘mga zarar yetkazilgan.
Noqonuniy foydalanish holatlarining eng ko‘pi Surxondaryo, Qashqadaryo, Jizzax, va Toshkent viloyatlarida qayd etilgan. Barcha holatlar bo‘yicha tegishli hujjatlar rasmiylashtirilib huquqni muhofaza qiluvchi organlarga taqdim etilgan.
Avvalroq Jizzaxda 45 mingdan ortiq aholi xonadonining 1 oylik iste’moliga teng elektr energiyasidan noqonuniy foydalanilgani aniqlangandi.
Izoh (0)