Ўзбекистонда сўнгги уч ойда электрга ноқонуний уланганлар тармоққа деярли 50 миллиард сўм зарар етказган. Бу ҳақда АОКАда ўтказилган брифингда «Ўзэнергоинспекция» ахборот хизмати раҳбари Наврўз Норбобоев маълум қилди.
Норбобоевнинг сўзларига кўра, «Ўзэнергоинспекция» томонидан 2022 йилнинг январь—март ойлари давомида ваколатли орган билан келишилган ҳолда ўтказилган тадбирларда 35 киловатт ва ундан юқори электр қурилмаларига эга бўлган тадбиркорлик субъектлари, энерготизими корхоналари, давлат ташкилотларида ҳамда электр тармоқларига ноқонуний уланиш бўйича жами 221 та ҳолат аниқланган. Бунинг натижасида 126 та истеъмолчи томонидан электр ва иссиқлик энергиясидан ноқонуний фойдалангани аниқланиб, энерготаъминот корхоналари томонидан жами 40,3 миллиард сўм етказилган зарар бўйича қайта ҳисоб-китоблар қилиниши таъминланган.
Шунингдек, шу вақтга қадар текширувларда ноқонуний уланган, қониқарсиз техник ҳолатдаги жами 2191 та электр қурилманинг иши ҳамда хавфсизликка риоя қилмаган 14 та бригаданинг иши тўхтатилди. 148 та масъул ходимига таъсир чоралар кўрилиши таъминланди.
Бундан ташқари, ҳудудий электр тармоқлари корхоналари ва ҳуқуқни муҳофаза қилувчи органлар билан бирга электр тармоқларига ноқонуний уланган истеъмолчиларни аниқлаш бўйича қўшма назорат тадбирлари ўтказилган. Унга кўра 277 та истеъмолчи томонидан амалдаги қоидаларга риоя этмаган ҳолда 12,8 миллион киловатт/соат электр энергиясидан ноқонуний фойдаланилгани аниқланган. Бунинг натижасида, тизимга 5,7 миллиард сўмга зарар етказилган.
Ноқонуний фойдаланиш ҳолатларининг энг кўпи Сурхондарё, Қашқадарё, Жиззах, ва Тошкент вилоятларида қайд этилган. Барча ҳолатлар бўйича тегишли ҳужжатлар расмийлаштирилиб ҳуқуқни муҳофаза қилувчи органларга тақдим этилган.
Аввалроқ Жиззахда 45 мингдан ортиқ аҳоли хонадонининг 1 ойлик истеъмолига тенг электр энергиясидан ноқонуний фойдаланилгани аниқланганди.
Изоҳ (0)