So‘nggi uch yilda davlat-xususiy sheriklikni rivojlantirish agentligi tomonidan 2,68 mlrd dollardan ortiq bo‘lgan 289 ta loyiha bo‘yicha ishlar olib borilgan

Moliya vazirligi huzuridagi Davlat-xususiy sheriklikni rivojlantirish agentligi tomonidan 2019—2021-yillar davomida umumiy qiymati 2,68 milliard dollardan ortiq bo‘lgan jami 289 ta davlat-xususiy sheriklik loyihalari bo‘yicha ishlar olib borilgan. Bu haqda AOKAda o‘tkazilgan brifingda Davlat-xususiy sheriklikni rivojlantirish agentligi direktori Zokir Bozorov ma’lum qildi.

Amalga oshirilgan loyihalar turli sohalar kesimida olib qaralganda, jumladan:

• energetika sohasida 1 ta;
• kommunal xizmatlar sohasida 3 ta;
• sog‘liqni saqlash sohasida 32 ta;
• suv xo‘jaligi sohasida 105 ta;
• ekologiya sohasida 62 ta;
• ta’lim sohasida 49 ta;
• hunarmandchilik sanoati sohasida 13 ta;
• madaniyat sohasida 20 ta;
• transport, veterinariya va chorvachilikni rivojlantirish, axborot texnologiyalari va huquqni muhofaza qilish sohalarida 1 tadan loyihalarni tashkil etadi.

Shundan davlat-xususiy sheriklik to‘g‘risidagi bitim imzolangan loyihalar soni 230 ta, bitim imzolanish arafasida bo‘lgan loyihalar soni 17 ta, tender bosqichida bo‘lgan loyihalar soni 46 tani tashkil etadi.

Amalga oshirilgan loyihalardan biri Yevropa tiklanish va taraqqiyot banki hamkorligida Qoraqalpog‘iston Respublikasining Qorao‘zak tumanida 100 MVt shamol elektr stansiyasi. Mazkur loyiha bo‘yicha 2021-yil 17-dekabr kuni loyiha bo‘yicha tender g‘olibi deb topilgan Saudiya Arabistonining ACWA Power kompaniyasi bilan Elektr energiyani sotib olish to‘g‘risidagi hamda Davlat tomonidan qo‘llab-quvvatlash to‘g‘risidagi bitimlar imzolangan.

Ushbu loyiha tender asosida amalga oshirilgan bo‘lib, ACWA Power kompaniyasi bilan birga tenderda ishtirok etish uchun Birlashgan Arab Amirliklarining Masdar kompaniyasi (taklifi — 2,6 sent) hamda Fransiyaning Voltalia kompaniyasi (taklifi — 3,2 sent) o‘z takliflarini bergan.

Loyihaning qiymati — 108 million dollarni va muddati 25 yilni, 1 kVt elektr tarifi — 2,56 sentni tashkil etadi. Mazkur loyiha doirasida:

• 110 mingdan ortiq xonadonlar uzliksiz elektr energiya bilan ta’minlanadi;
• yiliga 400 million kvt/s elektr energiya ishlab chiqariladi;
• 25 dan ortiq ilg‘or shamol turbinalari o‘rnatiladi;
• qurilish davrida 1000 ga yaqin yangi ish o‘rinlar va ekspluatatsiya davrida 50 ta doimiy ish o‘rinlari yaratiladi;
• tabiiy gazni noratsional ishlatish (yoqish) darajasi pasaytiriladi va ekologik jihatdan toza energiya ishlab chiqarishga erishiladi;
• atmosferaga zararli bo‘lgan karbonat angidrid gazlarining chiqishi keskin kamayadi (yiliga 160 ming tonnagacha).

Yana bir loyiha – Xalqaro moliya korporatsiyasining maslahat ko‘magida Toshkent shahri, Qoraqalpog‘iston Respublikasi va Xorazm viloyatlarida Gemodializ xizmati markazlari. Mazkur loyiha bo‘yicha 2021-yil 20-yanvar kuni tender g‘olibi bo‘lgan NephroPlus (Hindiston) kompaniyasi bilan DXSH to‘g‘risidagi bitim imzolandi (loyiha qiymati – 9,8 million dollar; loyiha muddati – 10 yil).

Tenderda Frezenus (Germaniya), Diaverum (Shvetsiya) va NephroPlus (Hindiston) kompaniyalari ishtirok etgan. Yakunda NephroPlus (Hindiston) – 503 401 so‘m (48,4 dollar) kompaniyasi tender g‘olibi deb topilgan. Endilikda kutiladigan natijalar:

• respublikada 1100 ta bemorga bir martalik dializator qo‘llagan holda gemodializ xizmati ko‘rsatiladi;
• xalqaro standartlar bo‘yicha gemodializ markazlari shakllanadi;
• har bir bemorlarga yiliga 144 seansdan kam bo‘lmagan dializ o‘tkaziladi;
• dializ sifatini oshishi va bemorlar umr ko‘rish davomiyligi 15-20 yilga oshiradi;
• malakali kadrlar bazasi shakllanadi;
• gemodializ markazlari davlatga qaytariladi.

Shuningdek, yana bir loyiha — Samarqand xalqaro aeroportini modernizatsiya qilish va boshqaruvga berish. Mazkur loyiha bo‘yicha 2021-yil 23-sentabr kuni Air Marakanda kompaniyasi bilan DXSH to‘g‘risidagi bitim imzolangan (loyiha qiymati — 82,8 million dollar; loyiha muddati — 20 yil).