Март ойида маҳаллий автомобиллар олди-сотдиси бўйича охирги 14 ой ичида рекорд қайд этилди

Ўзбекистонда чет элда ишлаб чиқарилган автомобилларнинг сотув ҳажми ойлар кесимида маълум қилинди. Март ойида чет элда ишлаб чиқарилган автомобилларнинг сотуви февралга қараганда 2,5 фоизга камайиб, 1,3 мингтани ташкил қилди. Бу ҳақда Иқтисодий тадқиқотлар ва ислоҳотлар маркази «Дарё»га маълум қилди

«Иномарка»лар сотуви ноябрдан бери энг паст кўрсаткичга тушиб кетди. Охирги 14 ой ичида энг юқори кўрсаткич декабрда қайд этилган — 2411. Декабрь ойида «иномарка»лар сотуви ноябрга қараганда қарийб икки баробар ошган.

Январь ойида енгил автомобиллар сотуви 1506 тани ташкил қилиб, ўтган йилнинг шу даврига нисбатан қарийб икки баробар ошди. Февралда бу кўрсаткич 1801 дона бўлган эди. 2021 йилнинг февралига нисбатан ўсиш 2,7 баробар бўлди.

Март ойида эса 1275 та чет элда ишлаб чиқарилган автомобиллар сотилди. Бу ўтган йилинг шу даврига қараганда 2 баробарга кўпроқ.

«Иномарка»лар сотувининг ошиши билан биргаликда, маҳаллий ишлаб чиқарилган автомобиллар сотуви ҳам сўнгги уч ойда кескин кўпайди. Январь ва февраль ойларининг ўзида бу кўрсаткич 2021 йилнинг шу даврига нисбатан 2,1 ва 2,2 баробарга ошди.

Март ойида маҳаллий автомобиллар олди-сотдиси сўнги 14 ой ичида энг юқориси бўлди.

Ўтган январь—февраль ойларидаги каби автомашиналарни рўйхатга олишнинг кўпайиши автомобилларни харид қилиш учун тўловларнинг бекор қилиниши билан боғлиқ.

Аввалроқ президент Шавкат Мирзиёев топшириғига кўра импорт автомобиллари учун божхона божи 2 баробарга қисқартирилгани ҳақида хабар берилган эди.