Freddi Rinkon boshqaruvidagi avtomobil avtobus bilan to‘qnashib ketdi. “Real” sobiq futbolchisi og‘ir ahvolda shifoxonaga yetkazilgan (video)

“Real”ning sobiq yarim himoyachisi Freddi Rinkon avtohalokatdan so‘ng og‘ir ahvolda kasalxonaga olib borilgan.

Marca nashrining xabariga ko‘ra, 11-aprel kuni Rinkon o‘tirgan mashina Kalida (Kolumbiya) avtobus bilan to‘qnashib ketgan. Ayni damda “Real”ning sobiq futbolchisi reanimatsiyada. Avtobus haydovchisi va yo‘lovchilari ham shifoxonaga yetkazilgan.

“Freddi Rinkonning ahvoli og‘ir deb baholanmoqda. Boshidan jiddiy jarohat olgan, operatsiya qilinadi”, — deydi kasalxona bosh shifokori Laureano Kintero.

Rinkon 1995-yildan 1996-yilga qadar madridliklar sharafini himoya qilgan. Sobiq yarim himoyachi 1986-yildan to 2004-yilga qadar davom etgan futbolchilik faoliyati davomida “Napoli”, shuningdek, Kolumbiya va Braziliyaning bir nechta jamoalari safida to‘p surgan. 1990-yildan 2001-yilgacha Kolumbiya terma jamoasidan chaqiruv olgan.

Avvalroq “Navbahor” futbol klubi a’zosi Samandar Yigitaliyev 29-dekabr, “Bunyodkor” futbolchisi Diyor Rahimqulov 11-dekabr kuni avtohalokat oqibatida vafot etgani ma’lum bo‘lgandi.