Kilian Mbappe “Real”ga o‘tadigan bo‘lsa qancha maosh va mukofot puli olishi ma’lum bo‘ldi

“Real” yozda “PSJ” hujumchisi Kilian Mbappe bilan shartnoma imzolashiga ishonmoqda.

Jurnalist Janluka di Marsioning xabariga ko‘ra, iyun oyida “PSJ” bilan shartnomasi yakuniga yetadigan hujumchi bilan Madrid jamoasi o‘rtasida og‘zaki kelishuv mavjud. Ammo Mbappe so‘zida turish yo turmasligi noma’lum.

Agar Kilian “Real”ga o‘tishga rozi bo‘lsa, yiliga 50 million yevrolik maoshga ega 5 yilga mo‘ljallangan shartnoma va 100 million yevro bonusga ega bo‘ladi.

“Qirollik klubi” 23 yoshli futbolchi bilan bitim imzolanishiga ishonmoqda. Madridliklar Mbappe bilan xuddi Krishtianu Ronaldu bilan bo‘lgani kabi bitim oldi kelishuvi imzolamoqchi bo‘lgan.

“Real” portugaliyalik hujumchi bilan 2008-yilning yozida, transfer amalga oshishidan bir yil oldin kelishib olgandi. Notarial tasdiqlangan bitimga ko‘ra, “Manchester Yunayted” 96 million yevro olishi ko‘rsatilgan. Agar shartnoma futbolchi yoki Madrid klubi tomonidan buziladigan bo‘lsa, 30 million yevro miqdorida jarima belgilangan edi.

Madrid klubi fransuz bilan ham xuddi shunday bitim imzolashni maqsad qilgan edi, ammo Mbappe bunga rad javobini bergan.

“PSJ” futbolchini o‘z safida olib qolish uchun harakat qilmoqda. Futbolchi esa hozircha yakuniy qaror qabul qilgani yo‘q.

Kilian Mbappe 2021/22-yilgi mavsum parijliklar safida barcha musobaqalarda 39 ta o‘yinda ishtirok etib, 31 ta gol va 18 ta golli uzatmaga mualliflik qilgan.