UEFA “Roma” va “Budyo-Glimt” jamoalari murabbiylarini yevrokuboklardan chetlatdi.
Norvegiya klubi bosh murabbiyi Kyetil Knutsen va “Roma”ning darvozabonlar murabbiyi Nunu Santush diskvalifikatsiya qilindi. Konferensiyalar Ligasining chorak finali dastlabki o‘yindan so‘ng ikkala murabbiy o‘rtasida janjal kelib chiqqandi.
Rim jamoasi futbolchisi Lorenso Pellegrini Knutsen Santushga hujum qilganini aytib o‘tgandi. Har ikkala murabbiy ham o‘z xatti-harakatlarini oqlash maqsadida bir-birini hujum qilganlikda aybladi.
Murabbiylarni vaqtinchalik chetlatish muddati UEFA tartib-intizom qo‘mitasi mazkur ish bo‘yicha qaror qabul qilgunga qadar davom etadi.
Konferensiyalar Ligasi chorak finalining javob o‘yinlari 14-aprel kuni bo‘lib o‘tadi. Joze Mourinyo shogirdlari dastlabki uchrashuvda 1:2 hisobida mag‘lubiyatga uchragandi.
Qayd etib o‘tish kerak, rimliklar ushbu jamoa bilan bir guruhdan o‘rin olgandi. Joze Mourinyo shogirdlari bitta o‘yinda yirik hisobda mag‘lubiyatga uchragan (1:6) bo‘lsa, yana bir bahsda durang (2:2) natija qayd etilgan.
Izoh (0)