UFC reytingi yangilandi: Hamzat Chimayev o‘z divizionida 8 pog‘ona yuqoriladi, Pyotr Yan umumiy reytingda keskin pastladi

AQShning Jeksonvill shahrida bo‘lib o‘tgan UFC 273 musobaqasidan keyin UFC’ning yangilangan reytingi e’lon qilindi.

Umumiy reytingda qator o‘zgarishlar ro‘y berdi. Yarim yengil vazn toifasi chempioni Aleksandr Volkanovski ikkinchi o‘ringa ko‘tarildi, Israel Adesanya bir pog‘ona pastlagan.

O‘ta yengil vazn toifasidagi chempionlik jangida g‘alaba qozongan Aljameyn Sterling top-15 likda paydo bo‘ldi: u 12-pog‘onada qayd etilgan. Sterlingga yutqazib qo‘ygan sobiq chempioni Pyotr Yan esa to‘rt pog‘ona pastlab, 13-o‘ringa tushib ketdi.

O‘z navbatida Yanning reytingi qulashidan keyin Glover Teysheyra (9-o‘rin), Deyvison Figeredo (10) va Stipe Miochich (11) bir pog‘onadan yuqorilagan. Brendon Moreno (14) va Robert Uittakerda (15) pasayish yuzaga kelgan.

Hamzat Chimayev yarim o‘rta vazn reytingida bir yo‘la 8 pog‘ona yuqoriladi va 3-o‘ringa ko‘tarildi. Unga mag‘lub bo‘lgan Gilbert Byorns esa ikki o‘rin pastlab, 4-pog‘onada turibdi. Ushbu divizionda chempion Kamaru Usmon hisoblanadi. Kolbi Kovington va Leon Edvards dastlabki ikki o‘rinni egallab turibdi.