Фредди Ринкон бошқарувидаги автомобиль автобус билан тўқнашиб кетди. «Реал» собиқ футболчиси оғир аҳволда шифохонага етказилган (видео)

«Реал»нинг собиқ ярим ҳимоячиси Фредди Ринкон автоҳалокатдан сўнг оғир аҳволда касалхонага олиб борилган.

Marca нашрининг хабарига кўра, 11 апрель куни Ринкон ўтирган машина Калида (Колумбия) автобус билан тўқнашиб кетган. Айни дамда «Реал»нинг собиқ футболчиси реанимацияда. Автобус ҳайдовчиси ва йўловчилари ҳам шифохонага етказилган.

«Фредди Ринконнинг аҳволи оғир деб баҳоланмоқда. Бошидан жиддий жароҳат олган, операция қилинади», — дейди касалхона бош шифокори Лауреано Кинтеро.

Ринкон 1995 йилдан 1996 йилга қадар мадридликлар шарафини ҳимоя қилган. Собиқ ярим ҳимоячи 1986 йилдан то 2004 йилга қадар давом этган футболчилик фаолияти давомида «Наполи», шунингдек, Колумбия ва Бразилиянинг бир нечта жамоалари сафида тўп сурган. 1990 йилдан 2001 йилгача Колумбия терма жамоасидан чақирув олган.

Аввалроқ «Навбаҳор» футбол клуби аъзоси Самандар Йигиталиев 29 декабрь, «Бунёдкор» футболчиси Диёр Раҳимқулов 11 декабрь куни автоҳалокат оқибатида вафот этгани маълум бўлганди.