«Манчестер Юнайтед» ҳужумчиси Криштиану Роналдунинг автомобилларга бўлган иштиёқи қанчалик даражада юқори эканлиги барча маълум. Февраль ойида футболчининг қайлиғи Жоржина Родригес ҳақидаги реалити-шоуда Роналдунинг гаражига ҳам саёҳат қилинди.
Замонавий суперкарлар жойлашган автопарк исталган «темир арава»лар шайдосини ўзига ром этиши аниқ. У ерда умумий қиймати 20 миллион евродан кўпроқ бўлган 18 та машинадан иборат коллекцияни кўриш мумкин.
Роналдунинг энг қиммат суперкари қиймати 10,1 миллион евро бўлган Bugatti Centodieci ҳисобланади. Криштиану уни 2020 йилнинг ёзида «Ювентус»нинг А Сериядаги ғалабаси шарафига харид қилган.
Bugatti Centodieci — чекланган миқдорда ишлаб чиқарилган русумдир. Франция компанияси бренднинг 110 йиллиги муносабати билан ушбу машиналардан атиги 10 дона ишлаб чиқарган. Автомобильнинг максимал тезлиги соатига 380 километрни ташкил қилади. У 2,4 сония ичида 100 км/соат тезликка чиқа олади.
CR7 нинг энг арзон араваси эса атиги 40 минг евро туради. Криштиану Chevrolet Camaro’да асосан онаси билан сайр қилишни маъқул кўради.
Унинг севимли автомобили Rolls-Royce Cullinan. У бу ҳақида 2019 йилда берган интервьюсида айтиб ўтган: «Бу машинада қанча юрсангиз ҳам белингиз оғриб қолмайди. Аксинча, бундай машинада ундан қутуласиз. Шунчаки идеал».
Тўпламдаги барча машиналар ҳам Криштианунинг шахсий харидлари эмас. Улар орасида совғалар ҳам топилади — масалан, Mercedes G-Wаgon Brabus. Бу «тойчоқ»ни унга қайлиғи Жоржина 2020 йилда суюклисининг 35 ёшга тўлгани муносабати билан совға қилган. Роналду машиналар борасида камтарлик қилиб ўтирмайди. Ўшанда у қувончини Instagram’да баҳам кўрганди: «Севгилим, ажойиб сюрприз учун раҳмат».
Жоржина 2022 йилда ҳам қайлиғини эътиборсиз қолдирмади. У Кришнинг 37 ёшга тўлишига атаб, Cadillac Escalade (150 минг фунт) ҳадя қилди.
Ронининг паркидан учта Ferrari ўрин олган, улардан бирини у 2021 йилнинг май ойида харид қилган ва бу ўзига хос шов-шувларга ҳам сабаб бўлганди. Роналду «Ювентус»нинг «Милан»дан учралган мағлубиятдан сўнг (0:3) дарҳол машинани олиб келишга кетиб қолади. Кришнинг машғулотларни ўтказиб юбориши эса жамоадошларини ғазаблантиради. Қизиғи, Ferrari базасига парвозда унга «Юве» президенти Андреа Анелли ҳамроҳлик қилади.
Роналду у ерда Формула-1 жамоаси раҳбари ва пойгачилар билан учрашиб, уларга ўз номи ёзилган футболкаларни топширади. Шунингдек, футболчи заводга ҳам ташриф буюриб, Ferrari Monzа SP1’ни қабул қилиб олади.
Ушбу моделнинг серияли ишлаб чиқарилиши 500 нусха билан чекланган. Айнан ушбу русум Златан Ибраҳимовичда ҳам мавжуд.
Ушбу Ferrari ўтган асрнинг 50 йиллардаги 750 Monzа ва 860 Monzа формулали автомобилларидан илҳомланиб ишлаб чиқарилган. Тўплам одатда махсус кийимлар тўплами билан жиҳозланади: пойга комбинезони, дубулға, қўлқоплар, шарф ва пойабзал. Барчаси — ўша давр пойгачиси қиёфасини қайта тиклаш учун. Суперкар 810 от кучи ва кучли В12 двигателига эга, бироқ унинг асосий хусусияти — олд ойнасининг («лобовой») йўқлигида.
Роналду фаолиятининг бошида машиналар ишқибози бўлмаган
Роналдунинг ҳаётидаги биринчи машина, албатта, ўйинчоқ бўлган, бироқ португалияликни бундай нарсалар билан алдаш мушкул эди. Футболчининг яқинлари шундай эслайди: «Байрамларнинг бирида унга пульт билан бошқариладиган машина совға қилдик, аммо бу уни хурсанд қилиш учун етарли бўлмади. У ҳеч қандай муносабат билдирмади, бутун вужуди футбол билан тўла эди».2017 йилда испан оммавий ахборот воситалари Криштианунинг Португалия телевидениесига берган биринчи интервьюсини топишнинг уддасидан чиқади. Ўшанда унинг қўлида «Олтин тўп» ўрнига кўп марталик метро чиптаси бор эди, холос, боиси бор пулини онасига жўнатарди. Машиналардаги уни қизиқтирадиган ягона жиҳат, қизил чироқдан қўзғалган вақтда улар билан тезлик борасида рақобатлашиш эди. Шунинг учун 2008 йилда, реклама ролиги учун Роналду Bugatti билан мусобақалашганида, футболчи учун сценарийни олдиндан ўқиш шарт эмасди.
Бироқ Роналду 2003 йилда «Манчестер Юнайтед»га кўчиб ўтиши билан ҳаммаси ўзгариб кетди. Криштиану фаолиятини минилган Ауди А3 машинасидан бошлаган, кейинроқ папарацсилар уни шаҳар бўйлаб Porsche Cayenne ва BMW М6’да (ўшанда 86 минг фунт стерлингга баҳоланган) юрганини пайқаб қолади. У вақтлар Роналду эндигина гаражини тўлдиришни бошлаганди. Кўп ўтмай «Юнайтед» базасидаги автотураргоҳда Ронига тегишли 140 минг фунтлик янги Bentley GT Speed пайдо бўлади.
Шундан кейин эса Криш машиналарга тамомила муккасидан кетди: янгидан янги нусхалар деярли ҳар йили, баъзида эса бундан ҳам тез муддатда қўшилишда давом этмоқда.
Изоҳ (0)