O‘zbekiston bo‘ylab 5 bosqichli ommaviy sport musobaqalari o‘tkaziladi

“Mahallalarda yoshlarni ommaviy sportga jalb qilishni yangi bosqichga olib chiqish chora-tadbirlari to‘g‘risida”gi prezidenti qarori qabul qilindi, deb xabar beradi O‘zA.

Ommaviy sportni rivojlantirishning asosiy yo‘nalishlari etib mahallalarda yoshlarning ommaviy sport bilan shug‘ullanishlari uchun moddiy-texnik bazani mustahkamlash va sport inshootlarini zamonaviy sport jihozlari bilan ta’minlash, shuningdek, imkoniyati cheklangan yoshlar uchun tegishli sport infratuzilmasini yaratish belgilangan.

Shuningdek, 2022-yildan har yili 30-iyun – O‘zbekiston yoshlari kuni hamda dekabrda o‘tkaziladigan “Yoshlar forumi” doirasida futbol, mini-futbol, voleybol, yengil atletika, shaxmat, shashka, stol tennisi, stritbol, vorkaut turlari bo‘yicha 5 bosqichli ommaviy sport musobaqalari o‘tkaziladi:

• birinchi bosqichda – ko‘chalararo mahalla musobaqalari;
• ikkinchi bosqichda – mahallalararo sektor musobaqalari;
• uchinchi bosqichda – sektor musobaqalarida g‘olib bo‘lgan mahalla jamoalari o‘rtasida tuman (shahar) musobaqalari;
• to‘rtinchi bosqichda – tuman (shahar) musobaqalari g‘olib mahalla jamoalari o‘rtasida viloyat musobaqalari;
• beshinchi bosqichda – viloyat musobaqalarida g‘olib bo‘lgan mahalla jamoalari o‘rtasida respublika (final) musobaqalari.

Bundan tashqari, 2023-yil 1-martdan boshlab olimpiya, noolimpiya va milliy sport turlari bo‘yicha uch bosqichli umumrespublika sport musobaqalarini o‘tkazish tizimi joriy qilinadi.

Qaror bilan Sportni rivojlantirish vazirligiga sport federatsiya (assotsiatsiya)lari bilan birgalikda ikki oy muddatda:

• mahallalarda ommaviy sport musobaqalarini tashkil etish va o‘tkazish bo‘yicha har bir mas’ulning ish faoliyatini to‘liq baholashga qaratilgan reyting tizimini joriy etish;
• yoshlar o‘rtasida ommaviy sport musobaqalarini ommalashtirish va ularning qiziqishlarini kuchaytirish maqsadida tajribali va taniqli sportchilar ishtirokida motivatsion uchrashuvlar tashkil etish tizimini yo‘lga qo‘yish;
• Yoshlar ishlari agentligi bilan birgalikda 2022-yil yakuniga qadar 6 million nafar yoshlarning ommaviy sport tadbirlari bilan qamrab olinishini ta’minlash vazifalari qo‘yilgan.