Qoraqalpog‘istonning Xo‘jayli tumanida ona o‘z farzandlariga zulm o‘tkazib, ularni xo‘rlayotgani tasvirlangan video tarqalgan edi. Keyinroq holat yuzasidan jinoyat ishi qo‘zg‘atildi. Qoraqalpog‘iston IIV xodimi bilan suhbatda ona nima sababdan farzandlarini kaltaklab kelganini ma’lum qildi.
“Qizlarimni urib videoga olganim sababi erim Rossiyada edi, men farzandlarim bilan birga yolg‘iz yashardim. Videoni yuborib, ukalari, balki, kelib qarashar degan maqsadda yubordim, yo‘q baribir kelishmadi. O‘rtada ota-onam kasal bo‘ldi, shok holatda edim. Qizlarimni urganimdan pushaymonman.
Ayolning so‘zlariga ko‘ra, u 2016-yilning mayda turmush qurgan, keyin iyunda eri bilan ishlash uchun dastlab Qozog‘istonga ketgan, so‘ng o‘sha yili avgustda Rossiyaga borgan. 3-4 oy ishlagach, farzandiga homilador bo‘lgan va ayol qaytib kelgan. Homilasi 7 oyligida yana Rossiyaga borgan, biroq bir oy o‘tmay yana ortga qaytgan.
“Maqsadim, erimning uyidan hech kim kelmasdi, nabiralarini urib, o‘ldirib qo‘ysam ham, ularning (erining ota-onasi – Daryo izohi) ishi yo‘q. Videoga o‘zim oldim va erimga jo‘natdim, menga rahmi kelar, uyidagilarga aytar, bizni yonimizga kelishar deb, lekin unday bo‘lmadi. Keyin yana videoga olib jo‘natdim, yana ta’sir qilgani yo‘q. Xudo ko‘zimni ochdi. Otam o‘ldi. ‘Otang o‘ldimi?’, deb uyga hech kim kelgani yo‘q”, — deydi ayol.
“Qaynonam qo‘rqitardi tarqatvoraman, ertaga televizorda ko‘rasan, deb. Aytganini qilishdi, nomardlik bo‘yicha birinchi o‘rin. Lekin mardlik qilib, men ming yomon ekanman, kelib nega nabiralarining boshini silamadi. Nega yo‘l-yo‘riq ko‘rsatmadi?”, — deydi ayol.
Ayolning aytishicha, hozirda er-xotin baxtli yashamoqda, biroq qaynonasi ularni ko‘ra olmay, eski videolarni tarqatgan.
Izoh (0)