Tibbiy-ijtimoiy xizmatlarni rivojlantirish agentligi tomonidan “Saxovat” va “Muruvvat” muassasalaridagi mavjud shart-sharoitlarni yanada yaxshilash, qo‘shimcha bino qurish yuzasidan mahalliy budjetlar hisobidan 14 milliard so‘m mablag‘ sarflangan. Bu haqda 9-aprel kuni Toshkent viloyatidagi tibbiy-ijtimoy muassasalarda bo‘lib o‘tgan press-tur davomida ma’lum qilindi, deb xabar berdi “Daryo” muxbiri.
Qayd etilishicha, “Muruvvat” va “Saxovat” uylarida o‘zgalar parvarishiga muhtoj, yotoq holdagi keksalar va nogironligi bo‘lgan shaxslarni shaxsiy gigiyena vositalari bilan budjet mablag‘lari hisobidan ta’minlash tizimi joriy etilgan. Unga o‘tgan davr mobaynida, qariyb 5,7 milliard so‘m mablag‘ ajratilgan.
Shuningdik, 2021-yilda agentlik tizimidagi 10 ta tibbiy-ijtimoiy muassasalarda jami 73 milliard so‘mlik qurilish, rekonstruksiya va mukammal ta’mirlash ishlari amalga oshirilgn.
2021-yil 1-apreldan boshlab 11 mingdan ziyod soha xodimlarining oylik maoshlari oshirildi. Jumladan:
“Saxovat” va “Muruvvat” internat uylari hamda Urush va mehnat faxriylari uchun respublika pansionatining rahbar va shifokorlar oylik lavozim maoshi 1,5 barobarga, o‘rta va kichik tibbiyot xodimlari oylik lavozim maoshi 2 barobarga —boshqa barcha xodimlar oylik lavozim maoshi 1,2 barobarga;
Agentlik markaziy apparati xodimlarining oylik lavozim maoshi 1,5 barobarga, uning hududiy boshqarmalari va tuman (shahar) bo‘limlari hamda Respublika tibbiy-ijtimoiy ekspertiza inspeksiyasi markaziy apparati va uning hududiy komissiya xodimlari oylik lavozim maoshi 1,2 barobarga oshirilgan miqdorda to‘lov amalga oshirilmoqda.
Bundan tashqari, 2022-yilda nogironligi bo‘lgan shaxs yoki uning vakili tomonidan tibbiy-ijtimoiy xizmatlar bo‘yicha tezkor murojaat qilish, shuningdek, protez-ortopediya moslamalari va reabilitatsiya qilish texnik vositalariga muhtoj bo‘lgan shaxslarning shaffof elektron navbat tizimi yaratilmoqda. Mazkur moslamalar va vositalar bilan o‘z vaqtida ta’minlashni amalga oshirish uchun barvaqt zarur zaxira yaratish maqsadida “Ijtimoiy xizmat” elektron platformasi ishlab chiqilmoqda.
Statistik ma’lumotlarga ko‘ra, dunyoda 1,1 milliard nafar “katta avlod” vakillari hamda 1 milliard – nogironligi bo‘lgan shaxslar istiqomat qiladi. O‘zbekistonda esa, “katta avlod” vakillarining soni 3 million dan ortiq, nogironligi bo‘lgan shaxslarning soni esa qariyb 1 million nafarni tashkil qiladi. Respublikada 135 ming nafardan muhtoj fuqarolarga turli tibbiy-ijtimoiy xizmat turlari ko‘rsatilmoqda.
Eslatib o‘tamiz, prezidentning 2021-yil 25-martdagi “Keksa va nogironligi bo‘lgan shaxslarni ijtimoiy qo‘llab-quvvatlash, ‘Saxovat’ va ‘Muruvvat’ internat uylari tizimini yanada rivojlantirish to‘g‘risida”gi farmoniga asosan Sog‘liqni saqlash vazirligi huzuridagi Tibbiy-ijtimoiy xizmatlar agentligi va uning hududiy bo‘linmalari negizida Tibbiy-ijtimoiy xizmatlarni rivojlantirish agentligi va uning hududiy bo‘linmalarini tashkil etish belgilangandi.
O‘zbekiston hukumatining 13-apreldagi qarori bilan Tibbiy-ijtimoiy xizmatlarni rivojlantirish agentligi rahbariyati tayinlandi.
Izoh (0)