Ilgarigi ta’lim standartida boshlang‘ich sinf o‘quvchilariga 40 foizdan ortiq noaniq talablar qo‘yilgan — Respublika ta’lim markazi

O‘zbekistonda 2017-yilda chop etilgan amaldagi dastur ekspertlar tomonidan xalqaro darsliklar va rivojlangan davlatlarning ta’lim dasturlari bilan solishtirib tahlil qilindi. Bu haqda Xalq ta’limi huzuridagi Respublika ta’lim markazi “Daryo”ga ma’lum qildi.

Tadqiqotda aytilishicha, AQSH Xalqaro Taraqqiyot agentligi (USAID)ning O‘zbekiston barkamollik uchun ta’lim dasturi doirasida olib borilgan o‘rganishlar shuni ko‘rsatdiki, ilgarigi dastur YUNESKO Butunjahon malaka dasturi bilan taqqoslanganda boshlang‘ich sinf o‘quvchilariga 50 foizga yaqin noaniq malaka talablari qo‘yilgan.

“TIMSS xalqaro dasturi bilan taqqoslaganda bu ko‘rsatkich 47 foizni, Janubiy Koreyaning ta’lim standartlari bilan taqqoslaganda esa 60—64 foizni tashkil qilgan”, — deyiladi markaz ma’lumotida.

Qo‘shimcha qilinishicha, ayni vaqtda Milliy o‘quv dasturi butunjahon malaka dasturi asosida takomillashtirilmoqda.

Avvalroq Respublika ta’lim markazi direktori Shuhrat Sattorov avvallari darsliklar murakkab, akademik tilda yozilgani va bu o‘quvchini fandan, maktabdan bezdirganini aytgan edi.