Қашқадарёда Давлат солиқ қўмитасининг қуйи органлари томонидан фуқароларнинг қўл телефонларига дағдағали SMS хабарномалар юборилаётгани айтилмоқда. Бу ҳақда «Дарё»га вилоятда фаолият юритувчи журналистлар маълум қилган.
«Давлат солиқ қўмитасининг айрим қуйи органлари одамларнинг қўл телефонига Солиқ:75-5226363: Ҳурматли фуқаро сизнинг хонадонингизга ҳисобланган солиқ қарздорлиги судга киритилмоқда. Шаҳрисабз т ДСИ (юборувчи рақам: 97. 406 17 17), деб ёзилган мавҳум хабарнома юбориб, ўтирган жойидан бечора солиқ тўловчиларга дағдаға қилмоқда. Сизда қайси хонадон, қачонги солиқ, қанча сумма, тўлов муддати қачон тугаган, судга киритилишига асос қани, деган саволлар туғилса, жавоб олиш учун SMS’да кўрсатилган телефон рақамига қўнғироқ қилишингиз фойдасиз», — дейди бу ҳақда «Дарё» мухбири билан суҳбатлашган журналист Камолиддин Каримов.Камолиддин Каримов туман Солиқ инспекциясининг бу ҳаракатини «Жисмоний шахслар 15 апрелга қадар 2022 йил учун ҳисобланган солиқнинг ярмини тўлашлари керак. Ҳаммаси ана шу бўйича режадан чиқмай қолишнинг олдини олишга қаратилган антиқа ҳаракатлар холос», — дейди.
Солиқ инспекциясининг огоҳлантирувчи смсълари ҳақида гапирган яна бир суҳбатдош, журналист Сарвиноз Исмоилова «Сизни судга бермиз», деб ёзилган дағдағали SMS хабарнома унинг онаси соғлиғи ёмонлашувчига сабаб бўлганини айтмоқда.
«Ўтган куни аямга шунақа SMS келган экан. Бўрттириш эмас-у, буни ўқиган аямнинг қон босимлари чиқиб кетди. Бу нимаси? Нимага бунча ваҳима деб мендан сўрадилар. Аям ҳам ҳайрон солиққа ҳам шунақа SMS ёзадими деб», — дейди Сарвиноз Исмоилова.
Мазкур ҳолатга изоҳ берган вилоят Солиқ бошқармаси ахборот хизмати ходими Зариф Келдиёров «Ҳақиқатан ҳам 2022 йилнинг 9 апрель куни Шаҳрисабз тумани давлат Солиқ инспекцияси масъул ходими томонидан фуқаролар хонадонига ҳисобланган солиқ қарздорлиги судга киритилаётгани қайд этилган смс-хабарнома жўнатилган. Бу хабар матни 2021 йилнинг октябрь ойида тайёрланган бўлиб, солиқ қарзи мавжуд фуқароларга огоҳлантириш сифатида жўнатилган. Масъул ходимнинг эҳтиётсизлик ва англашилмовчилик туфайли мазкур SMS’лар Шаҳрисабз тумани давлат солиқ инспекцияси базасидан 700 нафар ортиқ фуқароларга қайта юборилган. Аслида тўлов муддати яқинлашаётгани юзасидан эслатма хабар жўнатилиши керак бўлган. Эҳтиётсизликка йўл қўйган масъул ходимга нисбатан хизмат текшируви олиб борилади ва тегишли тартибда жазога тортилади», — деди.
Вилоят солиқ бошқармаси масъули шу ўринда қашқадарёликларга мурожаат қилиб, Солиқ кодексининг 423- ва 440-моддаларига асосан жисмоний шахсларнинг мол-мулк ва ер солиғини тўлаш муддати 15 апрель ва 15 октябрга қадар тенг улушларда амалга оширилиши лозимлигини эслатган.
«Солиқларни ҳудудий давлат солиқ инспекцияларига борган ҳолда ёки электрон тарзда мобил иловалар орқали тўлашингиз мумкин. Унутманг, солиқлар маҳаллий бюджет даромадларини тўлдириб, яшаб турган ҳудудларимизнинг ривожи, тараққиёти учун сарфланади. Солиқлар белгиланган муддатларда тўланмаган тақдирда, ҳар бир кечиктирилган кун учун Ўзбекистон Республикаси Марказий банкининг амалда бўлган қайта молиялаш ставкасининг уч юздан бир баравари миқдорида пеня ҳисобланишига сабаб бўлади», — дейди Зариф Келдиёров.
Изоҳ (0)