Ukraina hukumati Rossiyaga qarshi to‘liq savdo embargosini ma’qulladi. Bu haqda Ukraina Vazirlar Mahkamasining Oliy Radadagi vakili Taras Melnichuk ma’lum qildi.
“Rossiya Federatsiyasiga qarshi savdo embargosi joriy etildi. Ukrainaning bojxona hududiga Rossiyadan tovarlar olib kirish taqiqlanadi”, — deb yozgan Melnichuk Telegram’dagi kanalida.
Ukraina rasmiylarining hisob-kitoblariga ko‘ra, mamlakatlar o‘rtasidagi savdo aloqalarining to‘liq to‘xtashi Rossiyaga yiliga kamida olti milliard dollarga tushadi.
Rossiya Federal bojxona xizmati ma’lumotlariga ko‘ra, 2021-yilda Ukraina va Rossiya o‘rtasidagi savdo aylanmasi 23 foizga oshib, 12,3 milliard dollarni tashkil etgan.
2015-yildan beri Ukrainaga Rossiyadan ayrim tovarlarni olib kirish taqiqlangan, deb yozadi “Ukrainskaya pravda”. Bularga go‘sht, baliq, ba’zi sut mahsulotlari, qahva, choy, shirinliklar, spirtli ichimliklar va sigaretalar, dori-darmonlar, o‘g‘itlar, sanoat mahsulotlari, transport vositalari, qog‘oz mahsulotlari kiradi.
Avvalroq Yevropa Ittifoqi Rossiyaga qarshi navbatdagi sanksiyalar doirasida Rossiya ko‘miriga embargo qo‘yishni ma’qullagan. Yevropa Ittifoqi komissiyasi hisob-kitoblariga ko‘ra, ko‘mirga embargo qo‘yilsa Rossiya yiliga 4 milliard yevro daromad yo‘qotishi mumkin.
Izoh (0)