AQSH prezidenti Jo Bayden Rossiyadan energiya tashuvchilarni import qilish hamda Rossiya va Belarus bilan normal savdo aloqalarini to‘xtatish to‘g‘risidagi qonunlarni imzoladi. Bu haqda Oq uy matbuot xizmati xabar berdi.
Oq uyning aniqlik kiritishicha, Rossiya va Belarus bilan normal savdo aloqalarini to‘xtatish to‘g‘risidagi qonun savdo va inson huquqlariga qarshi sanksiyalarni yanada kuchaytirishga qaratilgan.
Bundan tashqari, Bayden Rossiyaga investitsiya kirishni taqiqlovchi va turli mahsulotlarni mamlakatga eksport qilishga qo‘yilgan cheklovlarni kengaytiruvchi qarorni imzolagan. Taqiqlar qatoridan AQSH fuqarolariga “qayerda bo‘lishidan qat’i nazar” Rossiyaga har qanday yangi investitsiyalar kiritishi o‘rin olgan. Shuningdek, cheklovlar eksport nazorati ostidagi har qanday toifadagi tovarlarni eksport, reeksport qilish, sotish yoki yetkazib berishga ham ta’sir ko‘rsatdi.
7-aprel kuni AQSH Kongressi Rossiya energetika mahsulotlari importini taqiqlash hamda Rossiya va Belarusni savdoda eng qulay davlat maqomidan mahrum etish to‘g‘risidagi qonun loyihalarini ma’qullagan. Agarda prezidentning importni taqiqlash to‘g‘risidagi qarorini uning davomchisi bekor qilmoqchi bo‘lsa, qonunning bekor qilinishiga AQSH Kongressida ovoz berish talab etiladi.
Avvalroq AQSHning sanksiyalar ro‘yxatiga Rossiya tashqi ishlar vaziri Sergey Lavrovning rafiqasi va qizi, 18 nafar amaldor kiritilgandi. Ular orasida Moskva meri Sergey Sobyanin, Rossiya bosh vaziri Mixail Mishustin ham bor.
Izoh (0)