Saudiya Arabistoni uch yil ichida birinchi marta xorij fuqarolariga Haj ziyoratini amalga oshirishga ruxsat berdi

Saudiya Arabistoni xorij fuqarolariga Haj ziyoratini amalga oshirishga ruxsat berdi. O‘tgan ikki yil davomida koronavirus pandemiyasi sabab xorijliklar Haj ziyoratiga qo‘yilmayotgan edi. 2022-yilda ziyoratchilarning umumiy soni 1 million kishiga yetdi, deb xabar beradi Saudiya Arabistoni axborot agentligi.

Ma’lum qilinishicha, 2022-yilda koronavirusga qarshi emlangan, 65 yoshgacha bo‘lgan fuqarolarning ziyoratlarni amalga oshirishiga ruxsat etiladi. Xorijliklar, shuningdek, Saudiya Arabistoni hududiga kirishdan uzog‘i bilan 72 soat oldin koronavirusga topshirilgan testning manfiy natijasini taqdim etishi kerak bo‘ladi.

2020 va 2021-yillarda podshohlik hukumati xorijlik ziyoratchilarning Haj amallarini bajarishiga ruxsat bermadi. 2021-yil oxirida Tatariston prezidenti Rustam Minnixanov Saudiya Arabistoniga tashrif chog‘ida “Sputnik V” vaksinasi bilan emlangan rossiyaliklarning Haj ziyoratini amalga oshirishiga ruxsat so‘ragan. Podshohlik bunga rozilik bergan.

Bundan tashqari, emlangan ziyoratchilarning mamlakatda bo‘lish muddati 10 kundan 30 kunga qadar uzaytirilgan. Saudiya Arabistoniga keluvchilar Pfizer, Moderna, AstraZeneca yoki bir komponentli Johnson & Johnson vaksinalari bilan emlangan bo‘lishi kerak. Xitoyning Sinopharm va Sinovac vaksinasi bilan emlanganlar yuqoridagi uch turdagi vaksinaning istalgan biri bilan qo‘shimcha emlansa, mamlakatga har qanday maqsadda tashrif buyurishiga ruxsat etiladi. Aks holda ularning faqat ziyorat qilishiga ruxsat berilgan.

Avvalroq O‘zbekistonda Umra ziyorati qachondan boshlanishi va uning narxlari haqida ma’lumot berilgandi. Unda 2020-yil fevral oyiga qadar Umra ziyorati uchun oxirgi belgilangan to‘lovlarni amalga oshirganlar qo‘shimcha ravishda 4 770 000 so‘m mablag‘ to‘lashi ham keltirib o‘tilgan edi. Ijtimoiy tarmoqlarda ushbu qo‘shimcha to‘lov borasida turli mulohazalar bildirilganidan so‘ng, Musulmonlar idorasi holatga izoh berib, koronavirus pandemiyasi Umra xizmatlari ko‘rsatishga ham salbiy ta’sir ko‘rsatganini ma’lum qildi. Qayd etilishicha, mehmonxonada 4 kishilik xonaga 2 nafar ziyoratchi, 50 o‘rindiqli avtobusga 25 kishi joylashtirish kabi talablar o‘rnatilgan. 22-yanvar kuni erta tongda Umra—2022 mavsumining ilk ziyoratchilari Toshkent xalqaro aeroportidan Saudiya Arabistoniga jo‘nab ketgandi.