Bo‘stonliqdagi “Bochka”da psixotrop modda sotuvchi ikki kishi qo‘lga tushdi

Toshkent viloyati Chorbog‘ qo‘rg‘onida 5-aprel kuni psixotrop moddasini sotayotgan shaxs tezkor tadbir davomida ushlandi, deb xabar bermoqda Tergov departamenti.

Qayd etilishicha, shu kuni soat 11:30 larda Toshkent viloyati IIBB Terrorizm va ekstremizmga qarshi kurashish boshqarmasi Tog‘li chegara tezkor xizmat bo‘limi xodimlari va Bo‘stonliq tumani IIB Jinoyat qidiruv bo‘limi xodimlari tomonidan hamkorlikda tezkor qidiruv tadbiri o‘tkazilgan. Tadbir davomida M.J. (30 yoshli) va M.T. (23 yoshli) Bo‘stonliq tumani Chorbog‘ qo‘rg‘onida joylashgan “Bochka” kafesining ovqatlanish shoxobchasi avtoturargohida ushbu tadbirga shartli ravishda xaridor sifatida jalb qilingan fuqaroga 800 ming so‘m pul evaziga “Sol alfa-PVP” moddasini sotgan vaqtida tadbir ishtirokchilari tomonidan ashyoviy dalillar bilan ushlangan.

Sud-kimyoviy ekspertizasida shartli ravishda xaridor sifatida jalb qilingan fuqarodan olingan sariq rangli rezina qopcha tekshirilgan. Natijada og‘zi mahkamlanadigan polimer paketchani ichidagi oq-sariq rangli yaltiroq kristall-kukunsimon moddaning tarkibida alfa-pirrolidinovalerofenon (a-RVR) moddasi mavjud bo‘lib, uning sof og‘irligi 0,101764 grammni tashkil etishi aniqlangan.

Holat yuzasidan yuqoridagi shaxslarga nisbatan Jinoyat kodeksning 273-moddasi 3-qismi “b” bandi (giyohvandlik vositalari, ularning analoglari yoki psixotrop moddalarni bir guruh shaxslar tomonidan oldindan til biriktirib ko‘p bo‘lmagan miqdorda qonunga xilof ravishda sotish) bilan jinoyat ishi qo‘zg‘atilib, protsessual tartibda ushlanganlar. Hozirda tergov harakatlari olib borilmoqda.

Bu turdagi jinoyatlar uchun Jinoyat kodeksining normalariga ko‘ra, 7 yildan 10 yilgacha ozodlikdan mahrum qilish jazosi belgilangan.