Namanganda maktablar yaqinida quyosh batareyalarida ishlaydigan ko‘chma svetoforlar o‘rnatilmoqda (foto va video)

Namanganda yo‘l yoqasida joylashgan maktablar yaqinida quyosh batareyalari yordamida ishlaydigan ko‘chma svetoforlar o‘rnatilmoqda. Bu haqda “Daryo” muxbiri Azizbek Abduvaliyev xabar bermoqda.

Namangan viloyat IIB YHXB Yo‘l harakatini tashkil etish bo‘linmasi muhandisi Rahmiddin Sirojiddinovning ma’lum qilishicha, viloyatda 2021-yili 1082 ta yo‘l-transport hodisasi sodir bo‘lgan. Ularning 50 foizdan oshig‘i piyodalar ishtirokida ro‘y bergan.

Bunday holatlarning oldini olish maqsadida tegishdi chora-tadbirlar belgilangan. Ushbu chora-tadbirlar doirasida Namangan shahar hokimligi tashabbusi bilan viloyat markaziga “aqlli” svetoforlar keltirildi.

“Ularni birinchi galda ta’lim muassasalari yonida o‘rnatishga qaror qilindi. Chunki YTHlar jabrdiydalari va qurbonlari orasida, afsuski, bolalar ham oz emas. Hozirgacha gavjum yo‘l yoqasida joylashgan 5 ta maktab atrofida shunday svetoforlar o‘rnatildi. 2022-yil oxiriga qadar bunday maktablar soni 23 taga yetadi”, — deydi Rahmiddin Sirojiddinov.

Quyosh paneli yordamida ishlaydigan mobil svetoforlar elektr energiyasi ta’minotida uzilishlar kuzatiladigan juda qulay. Qolaversa, statsionar svetoforlardan qariyb uch baravar arzon.

“Bunday svetofor dastlab bizning maktab oldida o‘rnatildi. Bundan minnatdormiz, chunki atrofimizda avtomobillar harakati ancha gavjum. Oldinlari o‘quvchilar maktabga keladigan payt ko‘chaga navbatchi chiqarishga majbur edik. O‘quvchilar to‘la-to‘kis sinflariga kirib ketgunicha xavotirda turardik. Endi bu xavotirlar ortda qoladi degan umiddamiz”, — deydi Namangan shahridagi 51-umumta’lim maktabi direktor o‘rinbosari Gulbahor G‘aniyeva.

Hozircha Namangan shahrida yo‘lga qo‘yilgan ushbu yangilikni kelgusida viloyatning boshqa shahar-tumanlarida ham joriy etish rejalashtirilmoqda.