АҚШ президенти Жо Байден Россиядан энергия ташувчиларни импорт қилиш ҳамда Россия ва Беларусь билан нормал савдо алоқаларини тўхтатиш тўғрисидаги қонунларни имзолади. Бу ҳақда Оқ уй матбуот хизмати хабар берди.
Оқ уйнинг аниқлик киритишича, Россия ва Беларусь билан нормал савдо алоқаларини тўхтатиш тўғрисидаги қонун савдо ва инсон ҳуқуқларига қарши санкцияларни янада кучайтиришга қаратилган.
Бундан ташқари, Байден Россияга инвестиция киришни тақиқловчи ва турли маҳсулотларни мамлакатга экспорт қилишга қўйилган чекловларни кенгайтирувчи қарорни имзолаган. Тақиқлар қаторидан АҚШ фуқароларига «қаерда бўлишидан қатъи назар» Россияга ҳар қандай янги инвестициялар киритиши ўрин олган. Шунингдек, чекловлар экспорт назорати остидаги ҳар қандай тоифадаги товарларни экспорт, реекспорт қилиш, сотиш ёки етказиб беришга ҳам таъсир кўрсатди.
7 апрель куни АҚШ Конгресси Россия энергетика маҳсулотлари импортини тақиқлаш ҳамда Россия ва Беларусни савдода энг қулай давлат мақомидан маҳрум этиш тўғрисидаги қонун лойиҳаларини маъқуллаган. Агарда президентнинг импортни тақиқлаш тўғрисидаги қарорини унинг давомчиси бекор қилмоқчи бўлса, қонуннинг бекор қилинишига АҚШ Конгрессида овоз бериш талаб этилади.
Аввалроқ АҚШнинг санкциялар рўйхатига Россия ташқи ишлар вазири Сергей Лавровнинг рафиқаси ва қизи, 18 нафар амалдор киритилганди. Улар орасида Москва мери Сергей Собянин, Россия бош вазири Михаил Мишустин ҳам бор.
Изоҳ (0)