Maktablardagi ta’lim sifati o‘qituvchi va direktorlarga bog‘liq. Bu haqda 8-aprel kuni AOKAda bo‘lib o‘tgan matbuot anjumanida xalq ta’limi vazirining birinchi o‘rinbosari Usmon Sharifxo‘jayev aytib o‘tdi, deya xabar bermoqda “Daryo” muxbiri.
Usmon Sharifxo‘jayevning ta’kidlashicha, vazir kelishi, ketishi mumkin. Ammo asosiy masala o‘qituvchi va maktab direktorida.
“Ta’lim sifati vazirga bog‘liq masala emas. Agarda o‘qituvchi va direktor yaxshi ishlasa, tepadagi rahbarning kim bo‘lishi muhim emas. Chunki tajriba buni ko‘rsatyapti. Masalan, men hozirda ikkinchi vazir bilan ishlab kelyapman. O‘sha vazir 10 mingta maktab uchun ham vazir, o‘sha topshiriq barcha uchun bir xil. Ammo ayrim maktablarning natijasi juda yaxshi, boshqalariniki qancha gapirilsa ham, qancha yaxshi sharoit yaratib berilsa ham, hattoki moddiy-texnik bazasi juda zo‘r qilib berilgan bo‘lsa ham, natijasi yomon. Qancha gapirmaylik, harakat yo‘q. Bu endi vazirga yoki boshqa kimgadir emas, aynan o‘sha yerdagi jamoaga bog‘liq”, — dedi vazir o‘rinbosari.
Uning qo‘shimcha qilishicha, ta’lim sifatining o‘zgargan yoki o‘zgarmagani nisbiy tushuncha hisoblanadi.
“Ta’lim sifati o‘zgarganmi, deyish nisbiy narsa. Misol uchun, siz yo‘q deyishingiz mumkin. Ammo biror zo‘r maktabda o‘qigan bolaning ota-onasi yaxshi deyishi mumkin. O‘rtacha olinsa, tendensiyani ko‘rish kerak. Masalan, 2020-yilgi o‘quv yilida o‘qishga kirishdagi o‘rtacha ball 70 ball bo‘lgan. Keyingi yili 75 ball bo‘lgan, ya’ni ko‘rsatgich 5 ballga oshgan. Butun dunyoda ta’limdan nima kutishadi-yu, biz nima kutib kelyapmiz. Shunga ham e’tibor berish lozim. Ko‘pchilik ota-onalar bolasi o‘qishga kirishini kutadi. Ular uchun zo‘r natija — bilimni yodlab olib o‘qishga kirish. Butun dunyoda ta’limdan o‘qishga kirish natija, lekin o‘qishga kirgan boladan bilim olishi va o‘sha bilimini hayotda ishlata olishini kutishadi. Vaqti kelib hamma ham o‘qishga kirishi mumkin. Lekin birortasi o‘rgangan oddiy narsasini hayotda tatbiq eta olmasa, ta’limning natijasi yo‘q desa ham bo‘ladi”, — dedi vazir o‘rinbosari.
Avvalroq Shavkat Mirziyoyev xalq ta’limidagi masalalarga oid yig‘ilishida maktab ta’limi eski qolipdan chiqa olmayotgani, tizimdagi ishlar qoniqarsiz ekanini aytgandi. Shuningdek, prezident mazkur majlisda O‘zbekistonda maktab o‘quvchilarini yangi metodika asosida qayta tayyorlash bo‘yicha umummilliy loyiha boshlanishini ma’lum qilgan.
Izoh (0)