2022/2023-o‘quv yilida boshqa hududlardan pedagoglar jalb etiladigan ta’lim darajasi yuqori bo‘lmagan maktablar ro‘yxati tasdiqlandi, deb xabar beradi Xalq ta’limi vazirligi matbuot xizmati.
Ta’lim darajasi yuqori bo‘lmagan maktablarga malakali pedagoglarni jalb etish orqali ta’lim sifatini oshirish maqsadida Xalq ta’limi vazirligi va Vazirlar Mahkamasi huzuridagi Ta’lim sifatini nazorat qilish davlat inspeksiyasi tomonidan ta’lim muassasalari ro‘yxati tasdiqlangan (to‘liq ro‘yxat).
Maktablar ro‘yxati Vazirlar Mahkamasining 2021-yilning 15-oktabrdagi “Ta’lim darajasi yuqori bo‘lmagan maktablarga malakali o‘qituvchi-pedagoglarni jalb qilish chora-tadbirlari to‘g‘risida”gi 646-son qarori talablariga muvofiq shakllantirilgan.
Ma’lumot uchun, ta’lim darajasi yuqori bo‘lmagan maktablarda dars berish uchun boshqa hududlardan jalb qilingan oliy va birinchi toifaga ega o‘qituvchi-pedagoglarning bazaviy tarif stavkalariga 100 foiz (bir ma’muriy birlik doirasida 50 foiz) maxsus ustamalar belgilanadi. 2021/2022-o‘quv yilida 1409 ta ta’lim darajasi yuqori bo‘lmagan maktablarga 500 nafarga yaqin pedagog jalb etilgan.
2022/2023-o‘quv yilida ta’lim darajasi yuqori bo‘lmagan maktablarga boshqa hududlardan pedagoglar borib ishlashlari uchun joriy yilning 15-may kunidan boshlab elektron platforma (“Ustozfondi.uz”) orqali ro‘yxatdan o‘tishlari talab etiladi.
Eslatib o‘tamiz, hukumatning “Ta’lim darajasi yuqori bo‘lmagan maktablarga malakali o‘qituvchi-pedagoglarni jalb qilish chora-tadbirlari to‘g‘risida”gi qarorga muvofiq pedagogika yo‘nalishlarida kunduzgi, kechki va sirtqi bo‘limlarining 3-kursida tahsil olayotgan talabalarga maktablarda dars berish huquqi berilgan (avvalgi tartibga binoan talabalar 4-kursdan boshlab maktablarda dars berishlari mumkin edi).
Izoh (0)