Toshkentdagi har bir mahallaga jami 2 mlrd so‘m ajratiladi

Shavkat Mirziyoyev raisligida 8-aprel kuni Saxovat, Muruvvat va Mehribonlik uylari hamda maxsus maktab internatlari faoliyati bo‘yicha videoselektor yig‘ilishi bo‘lib o‘tmoqda, deb xabar berdi “Daryo” muxbiri.

Qayd etilishicha, davlat rahbari 2021-yildagi poytaxtdagi 579 ta mahallaning har biriga 2 milliard so‘mdan, jami 1 trillion 158 milliard so‘m mablag‘ ajratilib, ichki yo‘llarni qurish-ta’mirlash bo‘yicha katta ko‘lamdagi ishlar amalga oshirilganini eslab o‘tgan.

“Bu chora juda yaxshi samara berganini hisobga olib, 2022-yilda ham har bir mahallaga respublika byudjetidan 1 milliard so‘mdan, mahalliy byudjetning qo‘shimcha daromadlari hisobidan yana 1 milliard so‘mdan ajratib, ichki yo‘llarni yaxshilaymiz. Bundan tashqari, Toshkent shahri mahalliy byudjetining birinchi chorakdagi prognozdan yuqori tushumi hisobidan 200 milliard so‘m mablag‘ mahallalar infratuzilmasini yaxshilashga yo‘naltiriladi”, — dedi prezident.

Shavkat Mirziyoyev Qoraqalpog‘iston Respublikasi, viloyatlar hokimliklari poytaxt tajribasi asosida, o‘zlarining markaziy shaharlarida obodonchilik, ozodalik va ko‘kalamzorlashtirishni ta’minlash, aholining bo‘sh vaqtini mazmunli tashkil etish bo‘yicha topshiriq berdi.