Ўзбекистонда мактаб ўқувчиларини янги методика асосида қайта тайёрлаш бўйича умуммиллий лойиҳа бошланади
Шавкат Мирзиёев 5 апрель куни ўтказилган йиғилишда халқ таълими соҳасидаги муаммоларга тўхталиб, ўқувчилар бундан буён янгича тизим орқали ўқитилишини айтди. Бу ҳақда Президент матбуот котиби хабар қилди.
Қайд этилишича, ҳамма вилоятларда Президент мактаблари очилган, уларда замонавий илғор методикалар асосида таълим берилмоқда. Хусусий мактабларда ҳам илғор методикалар жорий қилинмоқда. Шунингдек, республика бўйича айни пайтда 120 та мактаб юқори коэффициентда ишламоқда.
«Савол туғилади, қайси ҳоким ўз мактабларида ушбу илғор методикаларни жорий қилиш бўйича ишлаяпти? Афсуски, ҳозирча бундай ташаббуслар йўқ», — деган президент.
Бундан ташқари, кўплаб мактаб филиалларининг аҳволи мутлақо бугунги кун талабига жавоб бермайди. Мактабларни компьютер билан таъминлаш бўйича маблағлар ажратилган бўлса-да, Қорақалпоғистон, Андижон, Жиззах, Қашқадарё, Наманган ва Тошкент вилоятларида ишлар суст кетаётгани танқид қилинган. Олис ва чекка ҳудудлардаги ҳамда «оғир» шароитдаги мактабларда таълим сифатини ошириш билан боғлиқ ишлар қониқарсизлиги кўрсатиб ўтилган.
Президент келгуси устувор вазифаларни белгилаб берган. Энг аввало, мактаб ўқитувчиларини янги методика асосида қайта тайёрлаш бўйича умуммиллий лойиҳа бошланади. Ушбу янги тизим доирасида келгуси 3-4 йилда мактаблардаги барча синф ўқитувчилари янги методика асосида ўқитилади. Бунинг учун:
- 1 июнга қадар ҳар бир ҳудуддаги Малака ошириш марказлари негизида Педагогларни янги методикаларга ўргатиш миллий таълим марказлари ташкил этилади;
- ушбу марказларга математика, физика, кимё, биология, IТ каби аниқ ва табиий фанлар бўйича хориждан энг малакали мутахассислар жалб қилинади;
- хорижий мутахассислар ёрдамида олийгоҳ, миллий таълим марказлари ва мобил гуруҳларнинг муаллимларидан иборат ҳар бир вилоят кесимида «тренерлар гуруҳлари» шакллантирилади;
- мазкур тренерлар эса жойларда мактаб ўқитувчиларининг бевосита малакасини ошириб боради. Уларнинг ойлик иш ҳақига 100 фоизгача устамалар тўланади.
