Мактаблардаги таълим сифати ўқитувчи ва директорларга боғлиқ. Бу ҳақда 8 апрель куни АОКАда бўлиб ўтган матбуот анжуманида халқ таълими вазирининг биринчи ўринбосари Усмон Шарифхўжаев айтиб ўтди, дея хабар бермоқда «Дарё» мухбири.
Усмон Шарифхўжаевнинг таъкидлашича, вазир келиши, кетиши мумкин. Аммо асосий масала ўқитувчи ва мактаб директорида.
«Таълим сифати вазирга боғлиқ масала эмас. Агарда ўқитувчи ва директор яхши ишласа, тепадаги раҳбарнинг ким бўлиши муҳим эмас. Чунки тажриба буни кўрсатяпти. Масалан, мен ҳозирда иккинчи вазир билан ишлаб келяпман. Ўша вазир 10 мингта мактаб учун ҳам вазир, ўша топшириқ барча учун бир хил. Аммо айрим мактабларнинг натижаси жуда яхши, бошқалариники қанча гапирилса ҳам, қанча яхши шароит яратиб берилса ҳам, ҳаттоки моддий-техник базаси жуда зўр қилиб берилган бўлса ҳам, натижаси ёмон. Қанча гапирмайлик, ҳаракат йўқ. Бу энди вазирга ёки бошқа кимгадир эмас, айнан ўша ердаги жамоага боғлиқ», — деди вазир ўринбосари.
Унинг қўшимча қилишича, таълим сифатининг ўзгарган ёки ўзгармагани нисбий тушунча ҳисобланади.
«Таълим сифати ўзгарганми, дейиш нисбий нарса. Мисол учун, сиз йўқ дейишингиз мумкин. Аммо бирор зўр мактабда ўқиган боланинг ота-онаси яхши дейиши мумкин. Ўртача олинса, тенденцияни кўриш керак. Масалан, 2020 йилги ўқув йилида ўқишга киришдаги ўртача балл 70 балл бўлган. Кейинги йили 75 балл бўлган, яъни кўрсатгич 5 баллга ошган. Бутун дунёда таълимдан нима кутишади-ю, биз нима кутиб келяпмиз. Шунга ҳам эътибор бериш лозим. Кўпчилик ота-оналар боласи ўқишга киришини кутади. Улар учун зўр натижа — билимни ёдлаб олиб ўқишга кириш. Бутун дунёда таълимдан ўқишга кириш натижа, лекин ўқишга кирган боладан билим олиши ва ўша билимини ҳаётда ишлата олишини кутишади. Вақти келиб ҳамма ҳам ўқишга кириши мумкин. Лекин бирортаси ўрганган оддий нарсасини ҳаётда татбиқ эта олмаса, таълимнинг натижаси йўқ деса ҳам бўлади», — деди вазир ўринбосари.
Аввалроқ Шавкат Мирзиёев халқ таълимидаги масалаларга оид йиғилишида мактаб таълими эски қолипдан чиқа олмаётгани, тизимдаги ишлар қониқарсиз эканини айтганди. Шунингдек, президент мазкур мажлисда Ўзбекистонда мактаб ўқувчиларини янги методика асосида қайта тайёрлаш бўйича умуммиллий лойиҳа бошланишини маълум қилган.
Изоҳ (0)