Shavkat Mirziyoyev raisligida 8-aprel kuni Saxovat, Muruvvat va Mehribonlik uylari hamda maxsus maktab internatlari faoliyati bo‘yicha videoselektor yig‘ilishi bo‘lib o‘tmoqda, deb xabar berdi “Daryo” muxbiri.
Prezident 2022-yilda barcha tibbiy-ijtimoiy muassasalarni qurilish-ta’mirlash va jihozlashga 227 milliard so‘m ajratilishini aytgan.
“Shu bilan birga, bugungi yig‘ilishga tayyorgarlik ko‘rish jarayonida, biz barcha viloyat, shahar va tumanlar hokimlariga o‘z hududidagi har bir tibbiy-ijtimoiy tashkilotga borib, u yerdagi ahvolni o‘z ko‘zi bilan ko‘rib, muammolarni aniqlash va hal etish choralarini ko‘rish to‘g‘risida topshiriq berganmiz. Bugun ularning har biri qaysi muassasada qanday kamchiliklarni aniqlagani va nima choralar ko‘rgani to‘g‘risida hisobot beradi. Afsuski, bizdagi bor ma’lumotlar, joylardagi qator tibbiy-ijtimoiy muassasalarning sharoitini tubdan yaxshilash zarurligini ko‘rsatmoqda”, — deydi Shavkat Mirziyoyev.
Davlat rahbarining ma‘lum qilishicha, 36 ta Saxovat va Muruvvat uylaridan 12 tasida qo‘shimcha bino, 7 tasida yotoqxona, oshxona, tibbiyot bo‘limi, sport zali qurish, 21 tasida binolar va isitish-sovitish tizimini ta’mirlashga ehtiyoj mavjud.
“Shuningdek, 6 ta Mehribonlik va 11 ta kichik yoshdagi bolalar uylaridan 2 tasi ta’mirga muhtoj ahvolda. Xususan, Toshkent viloyati, Bo‘ka tumanidagi 15-son Mehribonlik uyida kanalizatsiya tizimi ta’mirtalab. Andijon viloyatida kichik yoshdagi bolalar uyining binolari kapital ta’mirga muhtoj. Imkoniyati cheklangan bolalarga ixtisoslashgan 86 ta maktab-internatdan 11 tasi kapital ta’mirlashni talab etadi. Jami 3 ta maktab-internatda qo‘shimcha o‘quv binosi, 5 tasida yotoqxona, 4 tasida oshxona, 15 tasida faollar va sport zali qurilishiga ehtiyoj bor”, — dedi prezident.
Shavkat Mirziyoyev 3 ta maktab-internatda isitish tizimi, 31 tasida yotoqxona, 10 tasida oshxona, sport va faollar zali, mehnat xonalari ta’mirtalab ekanini aytdi.
“Bundan tashqari, 22 ta sanatoriy shaklidagi maktab-internatdagi (skolioz va nafas yo‘llari kasalliklariga ixtisoslashgan) shart-sharoitlarni ham o‘rganib, tegishli choralar ko‘rish zarur. Mana shu misollar, aholining mehr va g‘amxo‘rlikka muhtoj qatlami uchun zarur shart-sharoitlarni yaratib berish borasidagi ishlarimiz hali qoniqarsiz ekanini ko‘rsatib turibdi”, — deydi prezident.
Davlat rahbari mas‘ullarga bir oy muddatda barcha tibbiy-ijtimoiy muassasalarning ahvolini yana bir bor chuqur o‘rganib, 2022—2024-yillarda ularda qurilish-ta’mirlash ishlarini bajarish va jihozlash bo‘yicha hukumat qarori loyihasini tayyorlash bo‘yicha topshiriq berdi.
Izoh (0)