Shavkat Mirziyoyev raisligida 8-aprel kuni Saxovat, Muruvvat va Mehribonlik uylari hamda maxsus maktab internatlari faoliyati bo‘yicha videoselektor yig‘ilishi bo‘lib o‘tmoqda, deb xabar berdi “Daryo” muxbiri.
“Saxovat, Muruvvat uylari, Respublika faxriylar pansionatining rahbar va shifokorlari ish haqi 1,5 barobarga, kichik va o‘rta tibbiyot xodimlari ish haqi 2 barobarga oshirildi. Ushbu internat uylarda yashovchi 9 ming 400 nafar keksa va nogironligi bo‘lgan shaxs, hamda 18 ming nafar hech kimi yo‘q va yolg‘iz yashaydigan fuqaro tibbiy ko‘rikdan o‘tkazilib, ularni sog‘lomlashtirish choralari ko‘rildi. Nogironligi bo‘lgan 900 nafar bolalar protez-ortopediya moslamalari bilan ta’minlandi. ‘Zamin’ jamg‘armasi bilan hamkorlikda zaif eshituvchi 2 mingdan ziyod bolalar jami 4 mingta raqamli eshitish moslamalari bilan ta’minlandi, 11 ta ixtisoslashgan maktab-internat yordamchi tovush-nutq vositalari bilan jihozlandi”, — dedi prezident.
Davlat rahbari, bundan tashqari, 1 ming 100 nafar nogironligi bo‘lgan shaxs pultli aravachalar bilan ta’minlanganini qayd etib o‘tdi.
“O‘tgan yili Saxovat, Muruvvat, Mehribonlik va bolalar uylari, faxriylar pansionatlari, maktab-internatlarda 172 milliard so‘mlik qurilish-ta’mirlash va jihozlash ishlari bajarildi. Masalan, 2021-yil 6-martda Respublika faxriylar pansionatiga tashrifda berilgan topshiriqlarga muvofiq, madaniy-ma’rifiy tadbirlar uchun alohida bino qurildi, yangi fizioterapiya bo‘limi tashkil etildi. Oshxona, yotoqxona va boshqa xonalar ta’mirlanib, yangidan jihozlandi. Shuningdek, pansionat hududi obod qilinib, unga tutash maydonda Nuroniylar bog‘i jadal barpo qilinmoqda”, — dedi davlat rahbari.
Izoh (0)