Россия рестораторлари Ўзбекистоннинг сабзавот, мева, тўқимачилик ва вино ишлаб чиқарувчилари билан ҳамкорликни йўлга қўйишга тайёр. Бу ҳақда Россия рестораторлар ва меҳмонхоначилар федерацияси президенти Игорь Бухаров маълум қилди, деб хабар беради «РИА Новости».
Маълум қилинишича, федерация раҳбари Ўзбекистоннинг Россиядаги элчиси Ботир Асадов билан учрашув ўтказган. Унда федерациянинг Россиядаги ресторан ва меҳмонхоналар учун Ўзбекистон маҳсулотлари ишлаб чиқарувчилари билан ўзаро ҳамкорлиги муҳокама қилинди.
«Бизни сабзавотлар, мевалар, ёнғоқлар қизиқтиради. Ўзбекистонда бутун бошли агросаноат кластерлари мавжуд. Шунингдек, у ерда пахтадан газлама ҳамда меҳмонхона ва ресторанлар учун тўқимачилик маҳсулотларини тайёрлайдиган енгил саноат кластерлари бор. Ҳатто ўзининг вино заводи ҳам бўлиб, улар ушбу маҳсулотни етказиб беришга тайёр», — дейди Бухаров.
Унинг таъкидлашича, олдинлари Ўзбекистон маҳсулотлари асосан бозорга етказиб берилган, рестораторлар билан эса ҳамкорлик йўлга қўйилмаган.
«Май ойида россиялик етказиб берувчилар ва харидорлар учун махсус тадбир ўтказишга келишиб олдик. Рестораторлар барчасини татиб кўриши ва тўғридан-тўғри шартнома имзолаши учун уларни шу тадбирга чақирамиз», — дея қўшимча қилади федерация раҳбари.
Эслатиб ўтамиз, март бошларида Россия Ўзбекистондан помидор ва қалампир импортига қўйилган барча чекловларни бекор қилганди.
Изоҳ (0)