Shavkat Mirziyoyev 7-aprel kuni bo‘lib o‘tgan videoselektor yig‘ilishida yo‘llar sifatini yaxshilash bo‘yicha bir qator vazifalar berdi. Bu haqda Prezident matbuot kotibi xabar qildi.
“Har bir viloyatda yirik sement korxonalari va xususiy korxonalar bilan birgalikda yo‘l qurish va ekspluatatsiya klasterlarini tashkil etish orqali ichki yo‘llarning egasini topish bo‘yicha topshiriq bergan edim. Bu borada Qoraqalpog‘iston, Jizzax, Qashqadaryo va Navoiydagi ishlar ahvoli qolgan hududlarga qaraganda hali sust”, — degan prezident.
Bu hududlar hokimlariga masalaning ichiga kirib, jiddiy shug‘ullanishi shartligi ko‘rsatib o‘tilgan. 2022-yilda 2 ming 300 kilometr, shu jumladan, Andijonda 270 kilometr, Farg‘onada 200, Qashqadaryo va Toshkent viloyatida 190, Navoiy, Namangan va Samarqandda 180, Buxoro, Jizzax va Surxondaryoda 170, Qoraqalpog‘iston va Xorazmda 160, Sirdaryoda 150 kilometr sement-beton qoplamali ichki yo‘llarni barpo etish vazifasi qo‘yilgan.
Buning uchun 2022-yilda sement ishlab chiqarish hajmi 3,5 million tonnaga ko‘payadi. Ya’ni, joriy yil yakuni bilan mahalliy sement ishlab chiqarish hajmi 18 million tonnaga yetadi. Bu bilan ichki ehtiyojlar to‘liq qoplanishi ta’kidlangan.
Eslatib o‘tamiz, prezident yig‘ilishda aholidan tushayotgan takliflarning 25 foizi ichki yo‘llardagi muammolar bilan bog‘liqligini aytib, mas’ullarga yo‘llar sifatini yaxshilash topshirig‘ini bergandi. (draftda)
Izoh (0)