Rossiya O‘zbekistondan pomidor va qalampir importiga qo‘yilgan barcha cheklovlarni bekor qildi

Rossiyaning Veterinariya va fitosanitariya bo‘yicha federal xizmati (“Rosselxoznadzor”) 5-martdan boshlab O‘zbekistondan Rossiyaga pomidor va qalampir import qilishga qo‘yilgan barcha vaqtinchalik cheklovlarni bekor qildi. Bu haqda “Rosselxoznadzor” matbuot xizmati xabar berdi.

Rasmiy ma’lumotlarga ko‘ra, ishlab chiqarish korxonalariga qo‘yilgan cheklovlar hisobga olinmagan holda, Rossiyaga to‘qqiz mamlakatdan sabzavot mahsulotlarini olib kirishga ilgari kiritilgan cheklovlar bekor qilinmoqda. Xususan, Rossiya O‘zbekistondan pomidor va qalampirni yetkazib berishga qo‘yilgan barcha cheklovlarni olib tashladi.

Shuningdek, Rossiya Ozarbayjon, Armaniston, Belarus, Qozog‘iston, Qirg‘iziston, Turkmaniston va Turkiyadan ham pomidor hamda qalampirlarning, Misrdan esa kartoshkaning olib kirilishiga qo‘yilgan cheklovlarni bekor qilgan.

Ma’lum qilinishicha, qaror ushbu mamlakatlarning karantini va o‘simliklarni muhofaza qilish milliy tashkilotlari tomonidan taqdim etilgan hududiylashtirish, shuningdek, Rossiya va YEOIIga a’zo davlatlarning fitosanitariya talablari buzilishining oldini olish bo‘yicha ko‘rilayotgan chora-tadbirlar to‘g‘risidagi ma’lumotlari tahlili asosida qabul qilingan.

Eslatib o‘tamiz, jigarrang bujmayish virusi aniqlangani sababli “Rosselxoznadzor” 2020-yil 26-noyabrdan boshlab Farg‘ona viloyatidan Rossiyaga pomidor va qalampir olib kirishni taqiqlagan edi. Keyinroq quritilgan o‘rik partiyasida ham xavfli zararkunanda (kapr qo‘ng‘izi) aniqlangach, “Rosselxoznadzor” Farg‘onadan barcha turdagi o‘simlik mahsulotlari importini taqiqladi. Rossiya tomoni shu kabi taqiqlarni Navoiy va Qashqadaryo viloyatida yetishtirilgan mahsulotlarga ham joriy etgan.

Rossiya 2021-yil aprel oyidagina O‘zbekistondagi 17 ta korxonadan pomidor va qalampir olib kirilishiga ruxsat bergandi. Iyulda esa mamlakat Toshkent va Buxoro viloyatlaridan import qilinadigan pomidor va qalampirga taqiq qo‘ygan edi.